بۇرىنعى ايەلىن ۇرعان پوليتسەي 200 مىڭ تەڭگەدەي ايىپپۇل تولەيتىن بولدى

قىزىلوردا. قازاقپارات - قىزىلوردادا س. ر. اتتى ازامات بۇرىنعى ايەلى ا. ق. -نىڭ ۇيىنە بارىپ، مۇلكىن قيراتىپ، سەبەپسىز ۇرىپ- سوعىپ، دەنساۋلىعىنا جەڭىل دارەجەدەگى دەنە جاراقاتىن سالىپ، وقيعا بولعان جەردەن كەتىپ قالعان.

سوتتالۋشى قاساقانا ادام دەنساۋلىعىنا جەڭىل دارەجەدە زيان كەلتىرىپ، قىلمىس جاساعان. بۇل تۋرالى قالالىق سوتتىڭ باسپا ءسوز قىزمەتى حابارلادى.

باستى سوت تالقىلاۋىندا سوتتالۋشى س. ر. سوتتا كىناسىن تولىق مويىنداپ، بۇرىنعى ايەلى ا. ق- نىڭ ۇيىنە بارىپ، اجىراسقاننان كەيىن ورتاق مۇلىكتى ءبولۋ ءۇشىن قۇجاتتارىن سۇراعانىن، ول قۇجاتتاردى بەرمەيمىن دەپ ايقاي شىعارعانىن، سودان وعان اشۋلانىپ ءۇيىنىڭ ءىشىن قيراتىپ تاستاعانىن، ىستەگەن ءىس-ارەكەتىنە شىن جۇرەكتەن وكىنەتىنىن، جابىرلەنۋشىدەن كەشىرىم سۇرايتىنىن جانە مورالدىق زيان ءوندىرۋ جونىندەگى جابىرلەنۋشىنىڭ تالاپ ارىزىنا قارسى ەكەنىن ايتتى.

جابىرلەنۋشى دە سوت تالقىلاۋىنداعى جاۋابىندا سوتتالۋشى س. ر. سوتتالۋشىنىڭ وزىنە ار- نامىسىنا تيەتىن سوزدەر ايتقانىن، پوليتسيا قىزمەتكەرلەرىنە ارىز جازبايسىڭ دەپ قورقىتىپ، قىسىم كورسەتكەنىن، بۇرىن سوڭدى ۇرىپ- سوققانىنا وسى ۋاقىتقا دەيىن شىداپ كەلگەنىن، سوتتالۋشىعا كەشىرىم بەرمەيتىنىن، تاتۋلاسۋعا قارسى ەكەنىن جانە ءتيىستى جازاسىن الۋدى سۇرايتىنىن جانە وزىنە 2000000 تەڭگە مورالدىق شىعىن كەلگەنىن، سول مورالدىق شىعىندى سوتتالۋشىدان ءوندىرۋدى سۇراعان.

سوت، جابىرلەنۋشى ا. ق- نىڭ ازاماتتىق تالاپ ارىزىننىڭ سوتتالۋشىدان مورالدىق زالال ءوندىرۋ تۋرالى بولىگى نەگىزسىز دەپ سانايدى، سەبەبى سوتتالۋشىنىڭ وسى قىلمىستىق ارەكەتىنەن سوڭ جابىرلەنۋشى تاراپتىڭ جان ازابىن شەككەنى انىقتالماعان.

سوتتالۋشى س. ر. قازاقستان رەسپۋبليكاسى ق ك- نىڭ 108-بابىمەن كىنالى دەپ تانىلىپ، وعان 100 (ءبىر ءجۇز) ايلىق ەسەپتىك كورسەتكىش مولشەرىندە - 198200 (ءبىر ءجۇز توقسان سەگىز مىڭ ەكى ءجۇز) تەڭگە ايىپپۇل سالىندى جانە مەملەكەت پايداسىنا سوت ساراپتاماسىن جۇرگىزۋگە جۇمسالعان سوت شىعىنى 4990 (ءتورت مىڭ توعىز ءجۇز توقسان توعىز) تەڭگە ءوندىرىلدى.

جابىرلەنۋشى ا. ق. -نىڭ مورالدىق زياندى ءوندىرۋ تۋرالى تالاپ ارىزى قاناعاتتاندىرۋسىز قالدىرىلدى. ۇكىم كۇشىنە ەنگەن جوق.