شىمكەنتتە جىلىنا 200 توننا قالدىق وڭدەيتىن زاۋىت اشىلدى

استانا. قازاقپارات - شىمكەنتتە جاڭادان ىسكە قوسىلعان كاسىپورىننىڭ ءبىرى - قوقىس وڭدەۋ زاۋىتى. شىمقالادان جىلىنا 185 مىڭ تونناداي قاتتى تۇرمىستىق قالدىق شىعادى.

ال جاڭا كاسىپورىن 200 مىڭ توننا قوقىستى وڭدەۋگە قاۋقارلى. سۇرىپتاۋ جەلىسىندە 180 ادام جۇمىس ىستەيدى. 1 ميلليارد تەڭگەدەن اسا قارجىعا سالىنعان زاۋىتقا بارلىق ينفراقۇرىلىمدى مەملەكەت ءوز قارجىسىنا جەتكىزىپ بەرگەن.

مۇندا شىنى، پلاستيكالىق زاتتار مەن قاعاز ارنايى سارالاۋدان ءوتىپ، كادەگە جاراتىلادى. ال قالعان قوقىس سىعىمدالىپ، شۇڭقىرعا كومىلەدى. كەلەر جىلى سەمەنت زاۋىتى ءۇشىن كەرەكتى وتىندى وسىنداعى قالدىقتاردان شىعارماق. ول ءۇشىن جەلى دە جاڭعىرتىلادى، دەپ حابارلايدى اكىمدىكتىڭ باسپا ءسوز قىزمەتى.

اۋماعى 5 گەكتار جەردى قۇرايتىن زاۋىتقا كۇنىنە 120-130 قوقىس ارتقان جۇك كولىكتەرى كەلەدى. بۇنىڭ ءبارى بۇكىل شاھاردان جينالعان قوقىس.

كونۆەيەردەن 1 تاۋلىكتە شىمكەنتتەن كەلەتىن 500 مىڭ توننا قوقىس وتەدى. مۇندا جۇمىسشىلار پوليەتيلەن بوتەلكەلەرى مەن قاعازداردى ىرىكتەپ، الىپ قالىپ وتىرادى. رەسەيلىك قۇرىلعى قاعاز، پوليەتيلەن بوتەلكەلەرىن جانە قوقىس قالدىقتارىن جىك-جىگىمەن توپتاستىرىپ شىعارادى. قاعاز بەن بوتەلكە قايتا وڭدەۋ كاسىپ ورىندارىنا، ال قالدىقتار پوليگونعا جونەلتىلەدى. قازىر مەكەمە قوقىستىڭ 10 پايىزىن قايتا كادەگە جاراتۋدا. كەلەر جىلى بۇل كورسەتكىشتى 50 پايىزعا دەيىن ارتتىرۋ جوسپارلانعان.