مەملەكەت ۇسىنعان باسپانادان 200 جاس وتباسى باس تارتىپ وتىر
ولاردىڭ ايتۋىنشا، پاتەر قۇنى تىم قىمبات. ال، جەرگىلىكتى بيلىك بولسا، پاتەر باعاسىنىڭ قول جەتىمدى ەكەنىن ايتىپ، قاراپايىم حالىقتى جۇباتىپ الەك.
كوكشەتاۋ قالاسىنىڭ تۇرعىنى قۋانىش وسپانوۆتىڭ وتباسى قۇرعاننان بەرى باسپاناسىز جۇرگەنىنە التى جىل بولىپتى. پاتەر كەزەگىندە تۇرعانىنا دا وسىنشا ۋاقىتشا وتكەن. جۋىردا «جانسايا» دەپ اتالاتىن جاڭا شاعىن اۋدانداعى قۇرىلىسى بىتۋگە ءتيىس تۇرعىن ۇيدەن جالعا بەرۋ نەگىزىندە پاتەر بەرىلەدى دەگەن حابار ەستىگەندە قۋانىشتىڭ قۋانىشى قوينىنا سىيمادى. الايدا، سول كوتەرىڭكى كوڭىلى كەيىن سۋ سەپكەندەي باسىلعان.
قۋانىش وسپانوۆ، كوكشەتاۋ قالاسىنىڭ تۇرعىنى:
337 پاتەر بەرىلەدى دەدى. قۋاندىق. قۇجاتتارىمىزدى جيناپ تاپسىردىق. كەيىن قازاقستاننىڭ يپوتەكالىق كومپانياسىنا جىبەردى. بارساق، ايىنا ەكى بولمەگە 69 مىڭ تەڭگە تولەيسىڭدەر 20 جىل بويى دەيدى. ودان قالدى جىلىنا 200 مىڭ تەڭگە سالىق تولەۋ كەرەك. ءوزىڭىز ويلاڭىز جاس وتباسىعا مۇنداي سوما كوپ. سوندىقتان مەن باس تارتتىم.
«جانسايا» تۇرعىن ۇيىنەن پاتەر الۋعا نيەتتى بولعانداردىڭ ىشىندە 200 گە جۋىق ادام مۇنداي تالاپتان سوڭ قۇجاتتارىن قايتارىپ الىپ، باس تارتقان. ال، تۇرعىن ۇيدەن پاتەر الۋعا ءالى دە بولسا نيەت تانىتىپ وتىرعان قالعان جاس وتباسىلار ولقىلىقتار تۇزەلمەسە كەلىسىم شارتتان باس تارتۋعا دايىن ەكەندىكتەرىن ايتادى.
بولات المەنوۆ، كوكشەتاۋ قالاسىنىڭ تۇرعىنى:
ەندى ءبىز وتكەن جولى قالا اكىمىنىڭ ورىنباسارى يسمايلوۆتان سۇراعان بولاتىنبىز، پاتەردىڭ كوممۋنالدىق قىزمەتى جايىندا. بۇل ءۇي ءالى كۇنگە دەيىن زاڭدى تۇلعانىڭ اتىندا تۇر. ەندى جەكە تۇلعالارعا قاراعاندا زاڭدى تۇلعالارعا تاريفتىك باعا وتە قىمبات. ءبىز قالاي تولەيمىز دەگەندە ول كىسى جاۋاپ بەرە المادى.
باقىتبەك بەكمۇرات ۇلى، كوكشەتاۋ قالاسىنىڭ تۇرعىنى:
ءبىر بولمەلى ءۇيدىڭ وزىنە جىلىنا 162 مىڭ تەڭگە نالوگ تولەۋ كەرەك. كوپتى تولعاندىرعان سۇراق بۇل سالىق قايدان شىققان. وسىعان بايلانىستى ءبىز قالالىق اكىمدىككە ساۋال جولدادىق. كەلىسىم شارتقا دەيىن ولار بۇل ماسەلەنى قاراستىرامىز دەگەندى ايتتى.
تۇرعىن ءۇي كەشەنى مەملەكەتتىڭ «نۇرلى جول» باعدارلاماسىنىڭ اياسىندا سالىنۋدا. وعان قازاقستاننىڭ يپوتەكالىق كومپانياسى دەلدالدىق قىزمەت كورسەتەدى. قاراپايىم حالىقتىڭ قالتامىزعا لايىقتالماعان دەگەن بۇل ۇيلەر تۋرالى اكىمدىكتەگىلەردىڭ جاۋابى دايىن.
امانگەلدى سمايلوۆ، كوكشەتاۋ قالاسى اكىمىنىڭ ورىنباسارى:
استانا مەن الماتىدا جالعا بەرىلەتىن پاتەرلەردىڭ قۇنى اناعۇرلىم جوعارى. بۇل تۇرعىن ءۇي كەشەنىنىڭ جوسپارى الدىن الا جان-جاقتى قاراستىرىپ بەكىتىلىپ قويىلعان. ەگەر جالعا الۋعا مۇمكىندىگى بار ادامدار بولماسا، جاڭا باعدارلاما اياسىندا مۇنداي ۇيلەر سالىنباس ەدى. اركىم ءوزىنىڭ تابىسىنا قارايدى عوي.
بۇل جاڭادان شىققان باعدارلامانىڭ العاشقى جوباسى دەيدى جەرگىلىكتى باسشىلىق. ال، باس تارتقان تۇرعىندار وزگە مەملەكەتتىك باعدارلامالاردىڭ اياسىندا وزگە قول جەتىمدى پاتەرگە يە بولارمىز دەگەن ۇمىتتەرىن ۇزبەي كەلەدى.
«31»
