الماتىدا 200 دەن استام بالا اۋە شارىمەن اسپانعا كوتەرىلدى

  الماتى. قازاقپارات- بۇگىن الماتىدا الەۋمەتتىك جاعدايى تومەن وتباسىلاردان جينالعان 200 دەن استام بالا اۋە شارىمەن اسپانعا كوتەرىلىپ، تۋعان قالاسىن كوز جەتەر بيىكتىكتەن تاماشالاۋعا مۇمكىندىك الدى. بۇل شارا 1- ماۋسىم - حالىقارالىق بالالاردى قورعاۋ كۇنىنە وراي ۇيىمداستىرىلدى.

ۇيىمداستىرۋشىلاردىڭ ايتۋىنشا، بۇل شارانىڭ باستى ماقساتى - بالالارعا ەرەكشە قۋانىش سىيلاۋ.

 ايتسا ايتقانداي، بۇگىن بالالار شىنىندا دا وزدەرىن اتاقتى فرانتسۋز جازۋشىسى، عىلىمي فانتاستيكانىڭ نەگىزىن قالاۋشى جيۋل ۆەرننىڭ اۋە شارىمەن ساياحات جاساعان كەيىپكەرلەرىندەي سەزىندى دەۋگە بولاتىنداي. ويتكەنى جەرگە تۇسكەن سوڭ بالالار، قۋانىشتارى قويىندارىنا سىيماي، اتا- انالارىن قاۋمالاپ، ءبىر- بىرىنە ءسوز بەرمەي العان اسەرلەرىمەن ءبولىسىپ جاتتى.

 «بۇگىن ءبىزدىڭ 7-12 جاس ارالىعىنداعى كىشكەنتاي «ساياحاتشىلارىمىز» ەشبىر قورىقپاستان اۋە شارىمەن كوككە كوتەرىلدى. ءتىپتى 5 جاستاعى بالالار دا ۇشۋعا نيەت ءبىلدىردى. ولارعا دا رۇقسات بەردىك. 15-20 مەتر بيىكتىككە دەيىن كوتەرىلگەن اۋە شارىن جەل ءارى- بەرى تەربەۋمەن بولدى. مۇنىڭ ءوزى بالالارعا ەرەكشە اسەر سىيلادى. جەرگە تۇسكەن سوڭ بالالار اۋە شارىنىڭ اياسىندا ەستەلىككە سۋرەتكە ءتۇستى. ودان باسقا، ءبىز ساياباقتا 4 جاسقا دەيىنگى بالالارعا ارناپ، الىپ باتۋت ورناتتىق. وندا بالالار سەكىرىپ، اسىر سالىپ وينادى. قۋانىشتارىندا شەك بولمادى» ، - دەدى ءوز سوزىندە وسى شارانى ۇيىمداستىرۋشى - «قازپوشتا» ا ق باسپا ءسوز حاتشىسى ليۋدميلا شۋستوۆا.

تاڭەرتەڭ ساعات 09:00 دا باستالعان شارا كۇندىزگى ساعات 13:00 كە دەيىن سوزىلدى.

ءبىر ايتا كەتەتىن جايت، بۇگىن ۇيىمداستىرۋشىلار الىپ شاردىڭ ءاربىر ۇشۋىن، ونداعى بالالاردى تولىققاندى سۋرەتكە ءتۇسىرۋ ءۇشىن ارنايى فوتوگراف شاقىرعان بولاتىن. ەندى، فوتواپپاراتى بولماعاندار ءوز بالاسىنىڭ سۋرەتىن الۋ ءۇشىن «قازپوشتا» ا ق ارنايى سايتىنا كىرىپ، سۋرەتتەردى وزىنە كوشىرە الادى نەمەسە ديسكىگە كوشىرىپ بەرۋگە ءوتىنىش جاساي الادى.

اۆتور: جاپپاربەرگەن ايبوتا