ورتالىق ازيا باسشىلارى 2005 -جىلدان بەرى العاش رەت كەزدەسۋى مۇمكىن - ەرلان قارين

استانا. قازاقپارات - قازاقستاننىڭ حالىقارالىق قاتىناستار كەڭەسى (ق ح ق ك) بيىلعى جىلدىڭ ماڭىزدى وقيعالارىن جاريالادى.

سونىڭ ىشىندە ورتالىق ازيا ەلدەرى اراسىنداعى بايلانىستاردىڭ كۇشەيۋى دە بار، دەپ حابارلايدى قازاقپارات ءتىلشىسى.

«نەگىزى، اتالعان ترەند بىلتىردان بەرى انىق بايقالىپ كەلەدى. دەگەنمەن، 2018 -جىلدا ورتالىق ازيا ەلدەرىنىڭ ارىپتەستىك قارىم-قاتىناستارى جاڭا فورماتتا داميدى دەپ ويلايمىز. بالكىم، تۇراقتى ءبىر فورماتقا كوشەرمىز. ماسەلەن، وتكەن جىلى ايماقتا ەكىجاقتى بايلانىستاردىڭ كۇشەيگەنىن بايقاساق، اعىمداعى جىلدا ورتالىق ازيا ەلدەرى ءوزارا قارىم-قاتىناستىڭ تۇراقتى ءبىر فورماتىنا كەلەدى دەگەن ويدامىز. ءدال سولاي بولسا، 2018-جىلدا ايماق كوشباسشىلارى كوپ جىلدان بەرى العاش رەت كەزدەسۋى ابدەن مۇمكىن. سوڭعى رەت ولار 2005-جىلى جينالعان. دەمەك، 13 جىلدان بەرى العاش رەت ورتالىق ازيا پرەزيدەنتتەرى كەزدەسەدى»، - دەيدى ساياساتتانۋشى ەرلان قارين.

ونىڭ ويىنشا، اتالعان كەزدەسۋ وتسە دە، ايماقتاعى بايلانىستار ەكىجاقتى، ارى كەتسە، ءۇشجاقتى قارىم-قاتىناستا ساقتالادى. ماسەلەن، «قازاقستان-وزبەكستان»، «وزبەكستان-قىرعىزستان»، "قازاقستان-قىرعىزستان»، يا بولماسا، «قازاقستان-وزبەكستان-تۇرىكمەنستان».

«ورتالىق ازيانىڭ نەگىزگى مەملەكەتتەرى اراسىنداعى بايلانىستاردىڭ ۇلەسى باسىم بولادى. دەگەنمەن، قازىرگى كەزدە بارلىعى تۇراقتى ءبىر مەحانيزمنىڭ بولعانىن قالايدى. سوندىقتان اعىمداعى جىلدا ورتالىق ازيانىڭ كوشباسشىلارى اتالعان مەحانيزمدى ءىس جۇزىندە قولعا الادى دەگەن بولجام بار. ول كەزدەسۋ بەيرەسمي فورماتتا ءوتۋى دە مۇمكىن»، - دەپ اتاپ كورسەتتى ە. قارين.

اۆتور: ارمان اسقاروۆ