قازاقستاندا بالالار ۇيىنە جىل سايىن 2000 نان استام بالا قابىلدانىپ، سوڭعى 5 جىلدا 10 مىڭنان استام بالانى وتباسىلار اسىراپ الدى
بۇل تۋرالى بۇگىن «ق ر-داعى الەۋمەتتىك جەتىمدىكتىڭ الدىن الۋ: جاعدايدى ساپالىق جاعىنان وزگەرتۋ جانە پروبلەمانى شەشۋدىڭ قازىرگى زامانعى تاسىلدەرى» اتتى دوڭگەلەك ۇستەل بارىسىندا ق ر ب ع م بالالار قۇقىعىن قورعاۋ كوميتەتىنىڭ ءتورايىمى ءزابيرا ورازاليەۆا ايتتى.
«سوڭعى 5 جىلدىڭ ىشىندە قۇرىلىمنىڭ وتباسىلىق فورماسىن دامىتۋدىڭ ناتيجەسىندە جەتىمدەر مەن اتا-اناسىنىڭ قامقورلىعىنسىز قالعان بالالارعا ارنالعان ۇيىمدار جەلىسىن 22 بىرلىككە قىسقارتۋعا مۇمكىندىك بەردى. ياعني، ءبىز 22 بالالار ءۇيى تۋراسىندا ايتىپ وتىرمىز. بۇل رەتتە وتباسىلاردىڭ تاربيەسىنە بەرىلگەن مەكەمە تاربيەلەنۋشىلەرىنىڭ ۇلەسى 14 تەن 21 پايىزعا دەيىن ۇلعايدى»، - دەدى ول.
ونىڭ اتاپ وتۋىنشە، بالالار ءۇيىنىڭ 10620 تاربيلەنۋشىسىن وتباسىلار اسىراپ العان.
«بالالار ءۇيى تاربيەلەنۋشىلەرىنىڭ جالپى سانى 4860 بالاعا ازايدى»، - دەدى ز. ورازاليەۆا.
ءوز كەزەگىندە «بالا وتباسىندا ءومىر ءسۇرۋ ءتيىس» قوعامدىق قوزعالىسىنىڭ ۇيلەستىرۋ كەڭەسىنىڭ باسشىسى شولپان بايبولوۆا اتا-انا قامقورلىعىنسىز قالعان بالالار سانىن ازايتۋ ءۇشىن ونىڭ شىعۋ سەبەپتەرىنە باسا نازار اۋدارۋ كەرەكتىگىن اتاپ ءوتتى.
«بۇگىندە بالالار ۇيلەرىندە اتا- انالارى بار نەمەسە ءتۇرلى سەبەپتەرمەن بالا اسىراۋعا مۇمكىندىگى نە بولماسا ءوز بالالارىن باققىسى كەلمەيتىن اتا- انالاردىڭ بالالارى تاربيەلەنىپ جاتىر. بۇل بالالار مۇنداي مەكەمەلەردە ۇزاق مەرزىمگە تۇراقتاپ قالادى. ولاردىڭ زاڭدى اتا-انالارىنىڭ بولۋىنا نەمەسە جاسىنىڭ ۇلكەندىگىنە بايلانىستى وزگە اتا-انالاردىڭ قامقورلىعىنا بەرە المايمىز»، - دەدى ش. بايبولوۆا.
قازاقستاندا جىل سايىن 900 دەن استام اتا-انا ءوز بالاسىن تاربيەلەۋ قۇقىعىنان ايىرىلادى.
ز. ورازاليەۆانىڭ اتاپ وتۋىنشە، بالالار ۇيلەرىندەگى تاربيەلەنۋشىلەر سانىنىڭ تومەندەۋى بايقالعانىمەن، بالالاردىڭ وتباسىندا ءتالىم- تاربيە الۋ قۇقىعىن تولىققاندى جۇزەگە اسىرۋعا كەدەرگى كەلتىرەتىن ءبىرقاتار پروبلەمالار ساقتالىپ وتىر.
«ساراپتاما كورسەتكەندەي، جىل سايىن 900 دەن استام اتا-انا ءوز قۇقىقتارىنان ايىرىلىپ، 2 مىڭنان استام بالا ينتەرناتقا قابىلدانادى. ىشكى ىستەر ورگاندارىندا 12 مىڭنان استام ناشار وتباسى ەسەپكە الىنعان. ولار 18 مىڭنان استام بالانى تاربيەلەپ وتىر»، - دەدى كوميتەت ءتورايىمى.
دوڭگەلەك ۇستەلگە بىلىكتى مامان رەتىندە شاقىرىلعان ر ف مەملەكەتتىك دۋماسىنىڭ وتباسى، ايەلدەر جانە بالالار ماسەلەلەر جونىندەگى كوميتەتى ساراپتامالىق كەڭەسىنىڭ تەڭ ءتورايىمى گالينا سەميا ءوز كەزەگىندە الەۋمەتتىك جەتىمدىكتىڭ الدىن الۋ جانە جەتىم بالالاردى وتباسىلىق تاربيەلەۋ سالاسىنداعى بىلىكتى مامانداردىڭ جوقتىعىن اتاپ ءوتتى.
«بىزدە «قامقورلىق ورگانىنىڭ مامانى»، «بالالار ءۇيىنىڭ تاربيەشىسى» ماماندىقتارى جوق. ياعني، ولاردى بىردە-ءبىر جوعارى وقۋ ورنى دايىندامايدى»، - دەدى ول.
اۆتور: مارلان جيەمباي
