20 مىڭ ستۋدەنت حوستەل جاعالاپ ءجۇر
عىلىم جانە جوعارى ءبىلىم ءمينيسترى ساياسات نۇربەك ەلىمىزدە قانشا ستۋدەنت حوستەلدەردە تۇرىپ جاتقانىن ايتتى، دەپ حابارلايدى Kazinform.
«جالپى، ەلىمىز بويىنشا قاۋىپسىزدىگى، جايلىلىعى جانە باسقالارى ساقتالعان شامامەن 170 حوستەلمەن، الماتىدا 85 حوستەلمەن كەلىسىمشارت جاسالعان. 20 مىڭعا جۋىق ستۋدەنت حوستەلدەردە تۇرىپ جاتىر»، - دەدى مينيستر ۇكىمەت وتىرىسىنان كەيىنگى بريفينگتە اگەنتتىك ءتىلشىسىنىڭ ساۋالىنا وراي.
وسى رەتتە ساياسات نۇربەك جوعارى وقۋ ورىندارىمەن كەلىسىمشارت جاساسقان حوستەلدەرگە عانا مونيتورينگ جۇرگىزىلەتىندىگىن جاسىرعان جوق.
«دەگەنمەن، ستۋدەنتتەردىڭ باسپانا تاڭداۋىنا - پاتەر جالداپ، حوستەلدەردە تۇرۋىنا شەكتەۋ قويۋعا قۇقىعىمىز جوق. مۇنداي ەسەپ جۇرگىزۋ وتە قيىن، مۇمكىن ەمەس دەسەك تە بولادى. ويتكەنى، جاتاقحاناداعى ورىننان باس تارتاتىن ستۋدەنتتەر دە بار»، - دەدى ول.
سونىمەن قاتار ول قازا بولعان ستۋدەنتتەردىڭ ج و و- مەن كەلىسىمشارت جاساسپاعان حوستەلدە نە ءۇشىن تۇرعاندىعىنا قاتىستى ساۋالعا جاۋاپ بەردى.
«قازىرگى ۋاقىتتا ۇكىمەتتىك كوميسسيا بارلىق سەبەپتەرى مەن زاڭ بۇزۋشىلىۇقتاردى انىقتاپ جاتىر. سولاردىڭ شەشىمىن كۇتۋمىز قاجەت»، - دەدى مينيستر.
