قازاقستان قىتايعا 2,7 ميلليارد دوللاردىڭ تاۋارىن ەكسپورتتادى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە KAZNEX INVEST كومپانياسىنىڭ باسقارما ءتوراعاسى بوريسبيي جانعۇرازوۆ ءمالىم ەتتى.
«قازاقستان قىتايعا نەگىزىنەن مەتالل، حيميا، ۋران ونىمدەرىن ەكسپورتتايدى. 2015 -جىلدىڭ 11-ايى ىشىندە قازاقستان قىتايعا 2,7 ميلليارد دوللاردىڭ وڭدەلگەن تاۋارىن ساتتى. بۇل 2014 -جىلدىڭ سايكەس كەزەڭىمەن سالىستىرعاندا، 16 پايىزعا كوپ. سوندىقتان، ءبىز اتالعان ونىمدەردىڭ ءوندىرىسىن ۇلعايتا الامىز»، - دەپ اتاپ ءوتتى ول.
ونىڭ ايتۋىنشا، الەمدەگى مەتالل باعالارىنىڭ تومەندەۋىنە قاراماستان، قازاقستاننىڭ قىتايعا باعىتتالاتىن ەكسپورتىنىڭ كولەمى مەن قارقىنىن ۇستاپ تۇرۋعا بارلىق مۇمكىندىكتەرى بار.
«باعا دەڭگەيى، ارينە، جاقسى ەمەس. دەگەنمەن، كولەم بويىنشا قازاقستان ونىمدەرىنىڭ قىتايعا باعىتتالاتىن بولىگىنىڭ قارقىنىن ساقتاپ كەلەمىز»، - دەدى « KAZNEX INVEST» ا ق باسشىسى.
اۆتور: جاسۇلان جولدىبايەۆ
