شارۋالارعا بەرىلەتىن 2,5 پايىزدىق نەسيەنىڭ شارتتارى بەكىتىلدى

استانا. قازاقپارات - اۋىل شارۋاشىلىعى مينيسترلىگىنىڭ اگروونەركاسىپتىك كەشەن سالاسىنداعى جوبالارعا كرەديت بەرۋ قاعيدالارى تۋرالى بۇيرىعى كۇشىنە ەندى، دەپ حابارلايدى قازاقپارات ءتىلشىسى.

قۇجاتتا جەرگىلىكتى اكىمدىكتەر بيۋجەتتىڭ كرەديت قاراجاتىن سەنىم بىلدىرىلگەن وكىلگە تاپسىرما شارتى بويىنشا بەرەتىنى ايتىلعان. ال جەرگىلىكتى اكىمدىكتىڭ وزىنە بۇل كرەديت رەسپۋبليكالىق بيۋجەتتەن 0,01 پايىز جىلدىق سىياقىمەن بەرىلەدى.

جەرگىلىكتى اكىمدىك جوبا ۇسىنۋشىلارعا بۇل كرەديتتى 10 جىلعا دەيىنگى مەرزىممەن، ەڭ جوعارى سوماسى 5 ميلليارد تەڭگەدەن اسپايتىنداي ەتىپ، نومينالدى جىلدىق سىياقى مولشەرلەمەسىن 2,5 پايىزدان اسىرماي، ا و ك سالاسىنداعى جاڭا جوبالاردى قۇرۋعا نەمەسە قولدانىستاعىلاردى كەڭەيتۋگە بەرىلۋ كەرەك.

كرەديت سۇرالاتىن جوبالار مىنا باعىتتاردى قامتۋى ءتيىس:

تاۋارلىق ءسۇت فەرمالارى (قۋاتى 400 باستان باستاپ)؛

ەتتى باعىتتاعى قۇس فابريكالارى (جىلىنا 5000 توننا قۇس ەتىنەن باستاپ)؛

كوكونىس ساقتاۋ قويمالارى (1000 توننادان باستاپ)؛

قازىرگى زامانعى سۋ ۇنەمدەۋ تەحنولوگيالارىن (شاشىراتىپ، تامشىلاتىپ سۋارۋ) پايدالانىلاتىن سۋارمالى ەگىنشىلىك (كارتوپ پەن كوكونىستەر، ازىق ءوندىرىسى).

كرەديت الۋشىنىڭ كەپىلگە قوياتىن مۇلكى بولۋى شارت.

سونداي-اق، نەگىزگى بورىشتى وتەۋگە 24 ايدان اسپايتىن جەڭىلدىك مەرزىمى بەرىلەدى.