ق. ءمامي: مەدياسيانى پايدالانۋ ارقىلى قارالعان سوت ىستەرى سانى 2,5 ەسەگە ارتتى
بۇل تۋرالى بۇگىن رەسپۋبليكا سوتتارىنىڭ 2014 - جىلدىڭ 1- جارتىجىلدىعىنداعى جۇمىستارىنىڭ قورىتىندىسىنا ارنالعان كەڭەيتىلگەن جيىندا ق ر جوعارعى سوتىنىڭ ءتوراعاسى قايرات ءمامي ءمالىم ەتتى.
«تولىقتاي العاندا، رەسپۋبليكا بويىنشا مەدياسيانى قولدانۋ ارقىلى قارالعان ىستەردىڭ سانى 2,5 ەسەگە ارتتى» ، - دەدى جوعارعى سوت ءتوراعاسى.
سونداي- اق ق. ءمامي بۇگىندە ەلىمىزدە ەلەكتروندى سوت ءوندىرىسى ەلەمەنتتەرى بەلسەندى ەنگىزىلىپ جاتقانىن اتاپ ءوتتى. ەلەكتروندى تالاپ ارىزداردىڭ سانى 2 ەسەدەن استامعا ارتىپ وتىر.
«رەسپۋبليكاداعى سوت وتىرىستارى زالدارىنىڭ باسىم بولىگى سوت پروتسەستەرىن تەحنيكالىق تىركەۋ جۇيەسىمەن جابدىقتالعان. سوت وندىرىسىنە قاتىسۋشىلاردى ەلەكتروندى قۇلاقتاندىرۋ قىزمەتى دامۋدا» ، - دەگەن ول بۇل شارالاردىڭ بارلىعى ازاماتتاردىڭ سوتقا سەنىمىن ارتتىرۋعا باعىتتالىپ وتىرعانىن باسا ايتتى.
اعىمداعى جىلى سوت جۇيەسى قىزمەتىن اتقارۋعا رەسپۋبليكالىق بيۋدجەتتەن 40 ميلليارد تەڭگەگە جۋىق قارجى قاراستىرىلىپ وتىر.
«رەسپۋبليكا سوتتارىن ماتەريالدىق قامتاماسىز ەتۋ كولەمى ارتتىرىلدى. 2014 - جىلى سوت جۇيەسى قىزمەتىن اتقارۋعا رەسپۋبليكالىق بيۋدجەتتەن 40 ميلليارد تەڭگەگە جۋىق قارجى قاراستىرىلىپ وتىر» ، - دەدى ق. ءمامي.
سونىمەن قاتار جوعارعى سوت ءتوراعاسىنىڭ سوزىنە قاراعاندا، ۇنەمدەۋ جانە قارجىنى ءتيىمدى ءبولۋ ەسەبىنەن رەسپۋبليكاداعى 165 سوت عيماراتىنا اعىمدىق جوندەۋ جۇمىستارى جۇرگىزىلدى. وعان شامامەن 1 ميلليارد تەڭگەگە جۋىق قارجى جۇمسالدى.
«بارلىق وبلىس ورتالىقتارىندا جانە الماتى مەن استانا قالالارىندا سوت قىزمەتكەرلەرىنە ارنالعان تۇرعىن ءۇي سالۋ ماسەلەسى قاراستىرىلۋدا» ، - دەپ قوستى ول.
ايتا كەتەيىك، كەڭەيتىلگەن جيىنعا جوعارعى سوت كەڭەسىنىڭ ءتوراعاسى ب. بەكنازاروۆ، مەملەكەتتىك باسقارۋ اكادەمياسى سوت تورەلىگى ينستيتۋتىنىڭ ديرەكتورى م. بەيبىتوۆ، سۋديالار وداعىنىڭ ءتوراعاسى س. بايباتىروۆ، جوعارعى سوتتىڭ قاداعالاۋشى سوت القالارىنىڭ ءتوراعالارى، جوعارعى سوتتىڭ سۋديالارى مەن قىزمەتكەرلەرى, رەسپۋبليكاداعى وبلىستىق جانە وعان تەڭەستىرىلگەن سوتتاردىڭ ءتوراعالارى مەن سۋديالارى قاتىسۋدا.
اۆتور: مارلان جيەمباي
