مەملەكەتتىك باعدارلامالاردىڭ ارقاسىندا جەڭىل ونەركاسىپتىڭ ءوندىرۋ كولەمى 2,4 ەسە ءوستى

استانا. قازاقپارات - مەملەكەتتىك باعدارلامالاردىڭ ارقاسىندا جەڭىل ونەركاسىپتىڭ ءوندىرۋ كولەمى 2,4 ەسە ءوستى. بۇل تۋرالى بۇگىن ق ر پارلامەنتى ماجىلىسىندەگى ۇكىمەت ساعاتىندا ق ر ينۆەستيتسيالار جانە دامۋ ءمينيسترى اسەت يسەكەشيەۆ ءمالىم ەتتى.

جەڭىل ونەركاسىپتەگى جاعداي مەن سالانى دامىتۋ جوسپارى جايىندا بايانداما جاساعان مينيستر: «سالادا ءبىراز جۇمىس جاسالدى. قارقىندى دامىپ كەتپەسە دە، ءبىرقاتار پروبلەمالار جۇيەلى تۇردە شەشىلە باستادى. وزدەرىڭىز بىلەتىندەي، يندۋستريالاندىرۋ باعدارلاماسىندا وڭدەۋشى ونەركاسىپتى دامىتۋ مىندەتى تۇر. سوندىقتان جەڭىل ونەركاسىپ نازاردان تىس قالمايدى»، - دەدى.

ونىڭ اتاپ وتۋىنشە، مينيسترلىككە قاراستى ونەركاسىپ كوميتەتىندە سالانىڭ پروبلەمالارى تالقىلانىپ، ولاردى شەشۋ ءۇشىن ارنايى جۇمىس توبىن قۇرىلعان. سونىڭ ارقاسىندا بيزنەسپەن بىرلەسىپ، ءبىراز ماسەلە ءوز شەشىمىن تاۋىپ وتىر.

«جەڭىل ونەركاسىپ توقىما ءوندىرىسى، تىگىن جانە اياق كيىم ءوندىرىسى سىندى ءۇش نەگىزگى ىشكى سالادان تۇرادى. يندۋستريالاندىرۋ ساياساتىنىڭ، سونىڭ ىشىندە بيزنەستىڭ جول كارتاسى، جۇمىسپەن قامتۋ، ونىمدىلىك، ەكسپورتتاۋشى باعدارلامالارىنىڭ ارقاسىندا جەڭىل ونەركاسىپتىڭ ءوندىرۋ كولەمى 2,4 ەسە ءوستى»، - دەدى ءا. يسەكەشيەۆ.

 ماسەلەن، مينيستر العا تارتقان دەرەكتەرگە سايكەس، نارەستەلەرگە ارنالعان كيىمدەر ءوندىرىسى 7,5، باس كيىمدەر 4، دايىن توقىما بۇيىمدارى 2,8 ەسە وسكەن. سونىمەن قاتار سالاداعى ەڭبەك ونىمدىلىگى 1,5 ەسە ارتقان. نەگىزگى كاپيتالعا سالىناتىن ينۆەستيتسيا كولەمى 6,8، تىكەلەي شەتەلدىك ينۆەستيتسيالار كولەمى 2 ەسە كوبەيگەن.

 «ارينە، ءبىز اتاپ وتكەن جۇمىستارمەن شەكتەلمەيمىز. 2019 - جىلعا دەيىن سالانى دامىتۋعا ارنالعان جوسپار جاسالدى. سونى ىسكە اسىرامىز»، - دەدى ول.

اۆتور: مارلان جيەمباي