ەندى ورىس ءتىلى 2-سىنىپتان، اعىلشىن ءتىلى 3-سىنىپتان باستاپ وقىتىلادى – مينيستر

نۇر-سۇلتان. قازاقپارات - ەندى قازاق تىلىندە وقيتىن مەكتەپتەردە 1-سىنىپ وقۋشىسى ءبىر عانا ءتىلدى، ياعني قازاق ءتىلىن مەڭگەرەدى.

ورىس ءتىلى 2-سىنىپتان، اعىلشىن ءتىلى 3-سىنىپتان باستاپ وقىتىلادى، دەپ حابارلايدى قازاقپارات.

بۇل تۋرالى ءبىلىم جانە عىلىم ءمينيسترى اسحات ايماعامبەتوۆ nur.kz پورتالىنا بەرگەن سۇحباتىندا ايتتى.

«زەرتتەۋلەر مەن تالداۋلار جۇرگىزگەننەن كەيىن ءبىز ءبىرىنشى سىنىپ وقۋشىسىنا بىردەن 3 ءتىلدى مەڭگەرۋ قيىن ەكەنىن كوردىك. بۇل - ءتيىمسىز. ءبىز بۇل ماسەلەگە قاتىستى شەشىم قابىلدادىق. ەندى قازاق تىلىندە وقيتىن مەكتەپتەردە 1-سىنىپ وقۋشىسى ءبىر عانا ءتىلدى، ياعني قازاق ءتىلىن مەڭگەرەدى. ءبىز بالانىڭ الدىمەن ءوز انا تىلىندە وقۋدى جانە جازۋدى ۇيرەنۋى ءۇشىن ءتيىستى جۇمىس جۇرگىزىپ جاتىرمىز. ەكىنشى سىنىپتا باعدارلاماعا ورىس ءتىلى، ءۇشىنشى سىنىپتا اعىلشىن ءتىلى قوسىلادى. ورىس تىلىندە وقيتىن مەكتەپتەردە 1-سىنىپتا ورىس ءتىلى مەن مەملەكەتتىك ءتىل، ال 3-سىنىپتان باستاپ اعىلشىن ءتىلى بولادى»، - دەپ تۇسىندىرگەن اسحات قانات ۇلى.

ادىستەمە تۇرعىسىنان الىپ قاراعاندا، بۇل - دۇرىس باعىت ەكەنىن دە اتاپ وتكەن ۆەدومستۆو باسشىسى.

مۇنداي زەرتتەۋلەر مەن ۇسىنىستار بۇرىن دا بولعان، سول سەبەپتى ونى ەنگىزۋ جوسپارلانىپ وتىر.