پورتۋگاليادا 2,2 ميلليون ليتر ىشىمدىك كوشەگە توگىلدى

ليسسابون. قازاقپارات - جەكسەنبى كۇنى پورتۋگالياداعى اناديا شاعىن قالاسىنىڭ كوشەلەرىندە قىزىل شاراپ وزەن بولىپ اقتى.

جەرگىلىكتى Levira اراق- شاراپ زاۋىتىنا تيەسىلى ەكى تسيستەرنا جارىلىپ، قالا كوشەلەرىنە 2,2 ميلليون ليتر الكوگول توگىلدى، دەپ حابارلايدى قازاقپارات New York Post باسىلىمىنا سىلتەمە جاساپ.

جەلىدە جاريالانعان ۆيدەودا 2000 عا جۋىق تۇرعىنى بار اناديا قالاسىندا كوشە بويىن جاعالاي قىزىل شاراپ اعىپ جاتقانى كورىنەدى.

توگىلگەن شاراپتىڭ كوپتىگى سونشالىق، ونىمەن وليمپيادالىق ءجۇزۋ باسسەينىن تولتىرۋعا بولادى.

قالا بيلىگى ەكولوگيالىق دابىل قاعىپ، توگىلگەن الكوگول جەرگىلىكتى چەرتيما وزەنىن لاستاماۋى ءۇشىن شۇعىل ارەكەتكە كىرىستى.

جەرگىلىكتى ب ا ق- تىڭ حابارلاۋىنشا، اناديا ءورت ءسوندىرۋ ءبولىمى «شاراپ تاسقىنىن» بوگەپ، وزەنگە جەتكىزبەي، جاقىن ماڭداعى ەگىستىككە باعىتتاعان.

ءورت سوندىرۋشىلەر الكوگول زاۋىتىنىڭ جانىنداعى ءۇيدىڭ جەرتولەسى شاراپقا تولعانىن حابارلادى.

اراق- شاراپ زاۋىتى بولعان وقيعا ءۇشىن حالىقتان كەشىرىم سۇراپ، شاراپ سىڭگەن توپىراقتى قازىپ العانىن ايتتى.

«ءبىز تازالاۋ جانە زاقىمدانعان جەرلەردى جوندەۋ كەتكەن بۇكىل شىعىندى ءوز موينىمىزعا الامىز»، - دەلىنگەن زاۋىت مالىمدەمەسىندە.