اتىراۋ وبلىسىندا 1 وقۋشىسى بار باستاۋىش مەكتەپ جابىلدى
قىزىلقوعا اۋدانىندا بۇرىن كەڭشار فەرماسىنىڭ ورتالىعى بولعان ەلدى مەكەندەر از ەمەس. سونىڭ ءبىرى - كەنباي. بۇل اۋىل وبلىس ورتالىعىنان 128 شاقىرىم قاشىقتا ورنالاسقان.
اتىراۋ وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، بۇل اۋىلدا 37 جىل بۇرىن باستاۋىش مەكتەپ اشىلعان. وتكەن وقۋ جىلىندا مەكتەپتە 2 وقۋشى وقىعان. بيىل وقۋشىنىڭ ءبىرى 5-سىنىپقا، ەكىنشىسى 4-سىنىپقا كوشكەن. وقۋشىلارعا 6 مۇعالىم ساباق بەرگەن. ال جاقىندا بۇل ءبىلىم ورداسى جابىلدى. سەبەپ - وقۋشى سانى ازايىپ، 1 وقۋشى قالعان.
قىزىلقوعا اۋداندىق ءبىلىم ءبولىمىنىڭ باسشىسى گۇلفايرۋز انجانوۆانىڭ ايتۋىنشا، 1 وقۋشى جامانسور ستانساسىنداعى باستاۋىش مەكتەپكە اۋىستىرىلعان. مۇندا 60 وقۋشى بار.
ال مۇعالىمدەرگە جامانسور جانە ساعىز ستانساسىنداعى مەكتەپتەردەن جۇمىس ۇسىنىلعان. ەكى ۇستاز اتىراۋ قالاسىندا، ءبىرى ماقات اۋدانىنداعى دوسسور كەنتىندە جۇمىسقا ورنالاسقان.
اۋدانداعى تاعى ءبىر باستاۋىش مەكتەپ تاسقۇدىق ەلدى مەكەنىندە دە اشىلعان. بۇل مەكتەپتە 9 وقۋشى وقيدى.
ال كەنباي اۋىلىنداعى تۇرعىندار باستاۋىش مەكتەپتىڭ تۇپكىلىكتى جابىلماعانىن قالايدى. ويتكەنى، شاعىن ەلدى مەكەندە مەكتەپكە بارۋعا دايىندالىپ جۇرگەن بالالار بار.
«ءبىزدىڭ اۋىلدىڭ باستى پروبلەماسى - باستاۋىش مەكتەپتىڭ جابىلۋى. ەندى بالالارىمىز الىستاعى اۋىلدارعا بارۋعا ءماجبۇر. ەكىنشى ماسەلە - اۋىلىمىزعا ءالى كۇنگە تابيعي گاز جەلىسىنىڭ تارتىلماعانى. گاز جەلىسىن كۇتكەنىمىزگە 30 جىلدان استى»، - دەيدى كەنباي اۋىلىنىڭ تۇرعىنى ەدىل تەمىربولاتوۆ.
ەسكە سالا كەتەلىك، بۇدان بۇرىن اتىراۋدا بىرنەشە مەكتەپتىڭ وقۋشىلارى جوندەۋ جۇمىسىنا بايلانىستى وزگە ءبىلىم ورداسىندا وقيتىنىن جازعان ەدىك.
كەيىن اتىراۋدا 11 مەكتەپ ءۇش اۋىسىمدا وقىتۋدى جالعاستىراتىنىن حابارلاعان بولاتىنبىز.
سونداي-اق اتىراۋ پروكۋراتۋراسى جوندەۋ جۇرگىزىلىپ جاتقان مەكتەپتەردى باقىلاۋعا العان ەدى.
