بيىل استىقتىڭ 1 تونناسى قانشا تەڭگە بولادى
«استىق وداعى رەتىندە ىشكى نارىقتاعى استىقتىڭ 1 تونناسىن قوسىلعان قۇن سالىعىن ەسەپتەگەندە 85-95 مىڭ تەڭگە بولادى دەپ كۇتىپ وتىرمىز. بۇل وتە ماڭىزدى»، - دەدى «قازاقستاننىڭ استىق وداعى» ساۋدا كوميتەتىنىڭ باسشىسى الەكساندر مالوۆ ب ا ق وكىلدەرىنە ارنالعان دوڭگەلەك ۇستەل بارىسىندا.
ونىڭ اتاپ وتۋىنشە، بۇل باعا نارىق قاتىسۋشىلارىنىڭ ءبارىنىڭ كوڭىلىنەن شىقپاۋى مۇمكىن.
«بۇل باعا اۋىل شارۋاشىلىعى تاۋارىن وندىرۋشىلەردىڭ ءبارىن بىردەي قاناعاتتاندىرماۋى مۇمكىن. ويتكەنى، وزىندىك قۇنى مەن ءوندىرىس كولەمىنە قاراۋ قاجەت. ءبىراق، بۇل ۇن مەن ناننىڭ ىشكى نارىقتاعى باعاسىن قالىپتاستىرۋ تۇرعىسىندا ۇكىمەتىمىزدىڭ كوڭىلىنەن شىعاتىن بولادى. سوندىقتان دا جوعارى باعا كۇتۋ وتە قيىن بولار. تومەن دە تۇسپەۋى ءتيىس. ويتكەنى، قازىردىڭ وزىندە اۋىل شارۋاشىلىعى تاۋارىن وندىرۋشىلەردىڭ وزىندىك قۇنى شەگىندە تۇرمىز. سول سەبەپتى وندىرۋشىلەردىڭ توڭىرەگىنە بارىنشا شوعىرلانىپ، ولاردىڭ وسى ماۋسىمدا بارىنشا جاقسى باعا بەلگىلەۋىنە مۇمكىندىك بەرۋ قاجەت»، - دەدى ول.
