اۋىل اماناتى جوباسىنا 1 تريلليون تەڭگە بولىنەدى - ءاليحان سمايىلوۆ
«اگروونەركاسىپ كەشەنىندە 536 ميلليارد تەڭگەنى قۇرايتىن 300-گە جۋىق جوبا ىسكە اسىرىلۋدا. كوكتەمگى ەگىس جانە ەگىن جيناۋ جۇمىستارىنا جەڭىلدەتىلگەن كرەديت بەرۋ كولەمى بيىل 140 ميلليارد تەڭگەگە دەيىن ۇلعايتىلدى. اۋىل شارۋاشىلىعى تەحنيكاسىنا جەڭىلدىكپەن كرەديت بەرۋ 145 ميلليارد تەڭگەگە جەتتى. جەڭىلدەتىلگەن باعامەن ەگىس جۇمىستارىنا 419 مىڭ توننا ديزەل ءبولىندى. سونىمەن قاتار ەگىن جيناۋعا قوسىمشا 400 مىڭ توننا ارزانداتىلعان ديزەل وتىنى قاراستىرىلعان»، - دەدى ۇكىمەت باسشىسى.
سونداي- اق پرەمەر- مينيستر بيىل مەملەكەت مەنشىگىنە قوسىمشا 5 ميلليون گەكتار اۋىلشارۋاشىلىق جەرلەرى قايتارىلاتىنىن اتاپ ءوتتى.
«اۋىلدىق اۋماقتارداعى الەۋمەتتىك، ينجەنەرلىك جانە كولىك ينفراقۇرىلىمدارىن جاڭعىرتۋعا باسا نازار اۋدارىلىپ وتىر. اۋىل حالقىنىڭ تابىسىن ارتتىرۋ ءۇشىن «اۋىل اماناتى» جوباسى ىسكە اسىرىلۋدا. سونىڭ شەڭبەرىندە ميكروكرەديت بەرۋ جانە كووپەراتسيانى كەڭەيتۋ كوزدەلىپ وتىر. بيىل 100 ميلليارد تەڭگە ءبولىندى. جوبا 7 جىل ىشىندە 1 ميلليوننان استام اۋىل تۇرعىنىن قامتيدى. وعان جالپى 1 تريلليون تەڭگە قاراستىرىلادى»، - دەدى ءاليحان سمايىلوۆ.
اۆتور:
ەسىمجان ناقتىباي
