كەلەر جىلدىڭ 1-قاڭتارىنان مۇناي گازى بيرجا ارقىلى ساۋدالانادى

نۇر-سۇلتان. قازاقپارات - ەلىمىزدە بەيىندى مەملەكەتتىك ورگانداردىڭ باقىلاۋىنداعى تاپشى تاۋارلار ءۇشىن ءبىرىڭعاي تاۋار بيرجاسى ايقىندالماق.

بۇل تۋرالى ق ر ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى. «باعالىق اۋىتقۋلارعا جول بەرمەي، سۇيىتىلعان مۇناي گازىنىڭ ساۋدا-ساتتىعىن ىسكە قوسۋ بويىنشا ءىس-شارالار قابىلداۋ تاپسىرىلدى. ماسەلەن، پرەزيدەنتتىڭ تاپسىرماسىنا سايكەس سۇيىتىلعان مۇناي گازى بيرجاسىنا كوشۋ 2023 -جىلعى 1-قاڭتارعا اۋىستىرىلدى. وسى جىلعى 20-شىلدەدە بيرجالىق ساۋدا- ساتتىق كەزىندە باعانىڭ كۇرت كوتەرىلۋىنە جول بەرمەۋگە مۇمكىندىك بەرەتىن بيرجالىق ساۋدانىڭ ۇلگىلىك قاعيدالارىنا وزگەرىستەر ەنگىزىلدى»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ اتاپ وتۋىنشە، بۇگىنگى تاڭدا سۇيىتىلعان مۇناي گازىن كولىككە ىلەسپە جۇك قۇجاتتاردى رەسىمدەۋگە مىندەتتى تاۋارلار تىزبەسىنە ەنگىزۋ، وتكىزۋ كولەمى مەن باعاسىن كورسەتە وتىرىپ، اۆتوگاز قۇيۋ ستانساسىنىڭ فيسكالدىق چەكتەردى شىعارۋى بويىنشا تالاپتاردى قاتاڭداتۋ سىندى وزگەرىستەر پىسىقتالۋدا.

«سونداي- اق بەيىندى مەملەكەتتىك ورگانداردىڭ باقىلاۋىنداعى تاپشى تاۋارلار ءۇشىن ءبىرىڭعاي تاۋار بيرجاسىن ايقىنداۋ ماسەلەسى قاراستىرىلۋدا. جوعارىدا كورسەتىلگەن ءىس-شارالار اشىقتىقتى قامتاماسىز ەتۋگە جانە سۇيىتىلعان گاز ساۋداسى كەزىندەگى وپەراتسيالاردى قاداعالاۋعا مۇمكىندىك بەرەدى»، - دەدى بولات اقشولاقوۆ.