قايتىس بولعاننان كەيىن دونور بولۋعا 1 مىڭعا جۋىق قازاقستاندىق كەلىسىم بەرگەن

نۇر-سۇلتان. قازاقپارات - قازاقستاندا بيىلعى 6 ايدا اعزا مۇشەسىنىڭ ترانسپلانتاتسياسى بويىنشا 100 دەن استام وپەراتسيا جاسالدى.

قازاقپارات بۇل تۋرالى ق ر دەنساۋلىق ساقتاۋ مينيسترلىگىنە سىلتەمە جاساپ حابارلايدى. ​قازاقستاندىقتار ءوزى قايتىس بولعاننان كەيىن اعزا دونورى بولۋعا ىقتيارى بار-جوعىن كوزى تىرىسىندە gov.kz پورتالىندا جازىپ كورسەتە الادى.

2020 -جىلدان بەرى پورتالدا 18 مىڭعا جۋىق ءوتىنىم تىركەلگەن: ونىڭ ىشىندە 17 مىڭنان اسا ادام دونورلىقتان باس تارتسا، 1 مىڭعا جۋىعى كەلىسىمىن بەرگەن. ​

«جالپى، قوعامدا اعزا مۇشەسىنىڭ دونورلىعىنا وڭ كوزقاراس قالىپتاستىرۋ ەلىمىزدىڭ دەنساۋلىق ساقتاۋ سالاسىنداعى ماڭىزدى ماسەلەلەردىڭ ءبىرى سانالادى. سول سەبەپتى ترانسپلانتاتسيانى ۇيلەستىرۋشىلەر بۇل باعىتتا كەڭ اۋقىمدى اقپاراتتىق- ءتۇسىندىرۋ جۇمىستارىن جۇرگىزەدى»، - دەدى ۆەدومستۆودان. قازىر ​قازاقستاندا 6 ترانسپلانتاتسيا ورتالىعى، 40 دونورلىق ستاتسيونار، 26 ستاتسيونارلىق جانە 16-ايماقتىق ترانسپلانتاتسيا ۇيلەستىرۋشىسى بار. 2012 -جىلدان بەرى ەلىمىزدە ترانسپلانتاتسيا بويىنشا رەسپۋبليكالىق ۇيلەستىرۋ ورتالىعى جۇمىس ىستەيدى. ونىڭ باستى مىندەتى - قازاقستان رەسپۋبليكاسىندا اعزا مۇشەسى دونورلىعىنىڭ ءتيىمدى ۇلتتىق جۇيەسىن قۇرۋ. ​ 2021 -جىلى اتالمىش ورتالىق 4 ءولى دونوردان جاسالعان ترانسپلانتاتسياعا ۇيلەستىرۋشى بولدى: ولاردان 10 دونورلىق اعزا مۇشەسى الىنىپ، ترانسپلانتاتسياعا ءزارۋ رەتسەپيەنتتەردىڭ رەگيسترىندە تىركەۋدە تۇرعان 10 پاتسيەنتكە سالىندى. ال بيىلعى 6 ايدا 2 ءولى دونوردان الىنعان 7 اعزا مۇشەسىنىڭ ترانپلانتاتسياسى جاسالدى.

«2021 -جىلى رەسپۋبليكانىڭ ترانسپلانتاتسيا ورتالىقتارىندا اعزا مۇشەسىنىڭ ترانسپلانتتاۋ بويىنشا 171 وپەراتسيا جاسالدى: ونىڭ ىشىندە 4 ءولى دونوردان 10 اعزا مۇشەسى، كوزى ءتىرى دونورلاردان 161 اعزا مۇشەسى اۋىستىرىلدى. ال بيىلعى جارتىجىلدىقتا ترانسپلانتاتسيا ورتالىعىندا اعزا مۇشەسىن الماستىرۋ بويىنشا 104 وپەراتسيا جاسالدى. ونىڭ ىشىندە 7 اعزا مۇشەسى ءولى دونوردان الىنسا، 97 اعزا مۇشەسى كوزى ءتىرى دونوردىڭ كەلىسىمىمەن الىندى»، - دەلىنگەن مينيسترلىك حابارلاماسىندا.

فوتو: قازاقستان رەسپۋبليكاسى دەنساۋلىق ساقتاۋ مينيسترلىگى