ەلوردادا 1-سىنىپقا قۇجات قابىلداۋ باستالدى

نۇر-سۇلتان. قازاقپارات - نۇر-سۇلتان قالاسى ءبىلىم باسقارماسىنىڭ ورىنباسارى باعلان سماتايەۆا بۇگىننەن باستاپ 1- تامىزعا دەيىن 1-سىنىپقا قۇجات قابىلداۋ باستالاتىنىن ايتتى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

وسى رەتتە ول ءبىلىمدى قاجەت ەتەتىن بالالاردى قابىلداۋ قالاي جۇزەگە اسىرىلاتىنىن ءتۇسىندىردى.

«بۇگىن، ياعني 1- ساۋىردەن باستاپ ءبىرىنشى سىنىپقا قۇجاتتاردى قابىلداۋ باستالىپ، وسى جىلدىڭ 1- تامىزىنا دەيىن جالعاساتىنىن ايتىپ كەتكىم كەلەدى. اتا-انالار قۇجاتتارىن «ەلەكتروندى ۇكىمەت» پورتالى ارقىلى بەرە الادى»، - دەيدى ءبىلىم باسقارماسى باسشىسىنىڭ ورىنباسارى باعلان سماتايەۆا.

ونىڭ ايتۋىنشا ءبىرىنشى سىنىپقا مىناداي قۇجاتتار قاجەت:

- اتا-انادان ءوتىنىش؛

- بالانىڭ تۋۋ تۋرالى كۋالىگى؛

- دەنساۋلىعى جونىندە انىقتاما (063№ /ۋ جانە 026№ /ۋ-3 فورماسى) - بالانىڭ ۇشتە ءتورت فوتوسى ەكى دانا.

«ال ەرەكشە ءبىلىمدى قاجەت ەتەتىن بالالاردى قابىلداۋ اتا-اناسىنىڭ كەلىسىمىمەن پسيحولوگيالىق- مەديتسينالىق-پەداگوگيكالىق كونسۋلتاتسيانىڭ قورىتىندىسى نەگىزىندە جۇرگىزىلەتىنىن اتاپ وتكىم كەلەدى.

سونداي-اق، سانيتارلىق نورمالاردى ساقتاي وتىرىپ، مامانداندىرىلعان ءبىلىم بەرۋ ۇيىمدارىنا كونكۋرستىق ىرىكتەۋ 1-20- ماۋسىم ارالىعىندا وففلاين (تەستىلەۋ) رەجيمىندە وتەدى، ال وتىنىشتەردى قابىلداۋ 1- ناۋرىز بەن 15- ءساۋىر ارالىعىندا ەرەجەگە سايكەس سايكەس وتەتىنىن حابارلايمىز»، - دەيدى ۆەدومستۆو باسشىسىنىڭ ورىنباسارى.

ال قوسىمشا ءبىلىم بەرۋ ۇيىمدارىندا وقۋ پروتسەسى اتا-انالاردىڭ وتىنىشتەرىنىڭ نەگىزىندە 10 ادامنان اسپايتىن كەزەكشى توپتاردا ساعات 09:00-18:00 گە دەيىن الدىن الا جازىلۋ بويىنشا دا جالعاسادى.

«جالپى ءبىلىم بەرەتىن مەكتەپتەر جانىنداعى قوسىمشا ءبىلىم بەرۋ ۇيىمدارى فيليالدارىنىڭ قىزمەتىنە تىيىم سالىندى، فيليالدار تەك جەكە ورنالاسقان ءۇي-جايلاردا جۇمىسىن جالعاستىرۋدا»، - دەدى ول.

سونداي-اق، اتا-انالار بارلىق سانيتارلىق نورمالاردى قاتاڭ ساقتاي وتىرىپ، ءبىرىنشى سىنىپقا قۇجاتتاردى قاعاز تۇرىندە ۇسىنا الادى.