بايقوڭىردا كارانتين 1- ناۋرىزعا دەيىن ۇزارتىلدى
كارانتيندى تاعى ەكى اپتاعا ۇزارتۋ تۋرالى شەشىم بايقوڭىر كەشەنىنىڭ باس مەملەكەتتىك سانيتارلىق دارىگەرىنىڭ ۇسىنىستارىنا سايكەس، قالا اكىمشىلىگىنىڭ باسشىسى كونستانتين بۋسىگيننىڭ قاۋلىسىمەن ماقۇلداندى.
رەسەيدىڭ ف م ب ا بايقوڭىر كەشەنى وبلىستىق اكىمشىلىگىنىڭ ستاتيستيكالىق مالىمەتتەرىنە سايكەس، سوڭعى ەكى اپتاداعى ەپيدەميولوگيالىق جاعداي الدىڭعى كەزەڭمەن سالىستىرعاندا ناشارلاپ كەتكەن.
بۇگىنگى كۇنى عارىش كەشەنى اۋماعىندا COVID-19 جۇقتىرعاندار سانى 1223 ادامعا جەتتى. بۇل كورسەتكىش الدىڭعى ەكى اپتادا اۋرۋ سانى 37 ادامعا كوبەيگەندىگىن بىلدىرەدى.
جۇقپالى اۋرۋلار اۋرۋحاناسىندا ەمدەلىپ جاتقان ازاماتتاردىڭ دا سانى ءوسىپ، 13 ادامعا جەتكەن. ءبىر ءولىم جاعداي تىركەلگەن. بايقوڭىر قالاسىنىڭ اۋماعىندا بارلىق شەكتەۋ كۇشىندە قالادى.
«كوروناۆيرۋس ينفەكتسياسى ءالى دە ءجىتى زەرتتەلمەگەن ءارى ەڭسەرىلمەگەن اۋرۋ بولىپ تۇر. سول ءۇشىن ماسكا رەجيمى، الەۋمەتتىك اراقاشىقتىق، سانيتارلىق ەرەجەلەر قاتاڭ ساقتالۋى كەرەك. كوروناۆيرۋس ينفەكتسياسىن جۇقتىرماۋدىڭ بىردەن ءبىر امالى - ۆاكتسيناتسيا»، - دەپ اتاپ ءوتتى قالالىق جەدەل شتاب.
بۇدان بۇرىن حابارلانعانداي، بايقوڭىردا كوروناۆيرۋسقا قارسى جاپپاي ۆاكتسينالاۋ ءجۇرىپ جاتىر. جەدەل شتاب قالا تۇرعىندارىن كوروناۆيرۋس قارسى ەكپە الۋعا شاقىرادى. بايقوڭىر تۇرعىندارىن جاپپاي ۆاكتسيناتسيالاۋ قالا تۇرعىندارىنا ۇجىمدىق يممۋنيتەتتى قالىپتاستىرۋعا جانە قالعان شەكتەۋلەردى جويۋعا مۇمكىندىك بەرەدى.