14:51, 29 - مامىر 2020 | GMT +5
اۋىلشارۋاشىلىق ونىمدەرىن ەكسپورتتاۋعا قاتىستى شەكتەۋلەردىڭ كۇشى 1-ماۋسىمنان جويىلادى
نۇر-سۇلتان. قازاقپارات – ق ر اۋىل شارۋاشىلىعى ءمينيسترى ساپارحان وماروۆ اۋىلشارۋاشىلىق ونىمدەرىن ەكسپورتتاۋعا شەكتەۋلەردى الىپ تاستاۋ تۋرالى بۇيرىققا قول قويدى، دەپ حابارلايدى قازاقپارات.
«وسى جىلدىڭ 1-ماۋسىمىنان باستاپ اۋىلشارۋاشىلىق ونىمدەرىن ەكسپورتتاۋعا بارلىق شەكتەۋلەر الىنىپ تاستالادى. ەكسپورتتىق شەكتەۋلەردى الىپ تاستاۋ تۋرالى جاڭا بۇيرىق 2020 -جىلدىڭ 1 ماۋسىمىنان باستاپ كۇشىنە ەنەدى»، دەلىنگەن اتالعان مينيسترلىكتىڭ رەسمي سايتىندا جاريالانعان حابارلامادا.
ەستەرىڭىزگە سالا كەتەيىك، بۇعان دەيىن قازاقستاندا توتەنشە جاعدايدىڭ ەنگىزىلۋىنە جانە مەملەكەت باسشىسىنىڭ ىشكى نارىقتا الەۋمەتتىك ماڭىزى بار ازىق-تۇلىك تاۋارلارىنىڭ جەتىسپەۋشىلىگىن بولدىرماۋ تۋرالى بۇيرىعىنا بايلانىستى، ق ر اۋىل شارۋاشىلىعى مينيسترلىگى ازىق- تۇلىك قاۋىپسىزدىگى سەبەپتەرى بويىنشا ءارى جاڭا ءونىم جينالعانعا دەيىن جەتكىلىكتى قوردى ساقتاۋ ماقساتىندا اۋىلشارۋاشىلىق ەكسپورتىن ۋاقىتشا رەتتەۋدى ەنگىزگەن بولاتىن.
