قازاقستان مەكتەپتەرى 1-ساۋىردە وقۋشىلارعا سىناما ساباق وتكىزەدى
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ورتالىق كوممۋنيكاتسيالار قىزمەتىندەگى بريفينگتە مالىمدەدى.
«1-ساۋىردە ەلىمىزدىڭ بارلىق مەكتەپتەرىندە سىناما جۇرگىزىپ، مۇعالىمدەر بالالاردىڭ جۇيەگە قالاي قوسىلعانىن تەكسەرەدى. بەيسەنبى كۇنى – 2-ساۋىردە اتا- انا جينالىسىن وتكىزىپ، جۇيەگە قوسىلۋدى، بالالار جۇمىسىن دۇرىس ۇيىمداستىرۋدى ۇيرەتەمىز»، - دەدى مينيستر.
3-ءساۋىر - جۇما كۇنى وقۋشىلارمەن سىنىپ ساعاتتارى جۇرگىزىلەدى. وندا دا بالالارعا ءتيىستى اقپارات بەرىلىپ، قاشىقتان وقۋ فورماتى تۋرالى بارلىق سۇراقتارعا جاۋاپ بەرىلەدى.
«وسىلايشا، 6-ساۋىردە مەكتەپ تە، اتا-انا دا، قۇرىلعىلار دا قاشىقتان ءبىلىم بەرۋگە دايىن بولۋى كەرەك»، - دەدى ا. ايماعامبەتوۆ.
بۇعان دەيىن مينيستر قازاقستاندىق مەكتەپ وقۋشىلارىنىڭ تەلەديدار، راديو، ينتەرنەت جانە پوشتا ارقىلى ءبىلىم الاتىنىن مالىمدەگەن ەدى. بارلىق سۇراقتار بويىنشا ءبىلىم جانە عىلىم مينيسترلىگىنىڭ 1450 كولل-ورتالىعىنا حابارلاسۋعا بولادى.
اۆتور: ايجان سەرىكجان قىزى