پوليتسەيلەرگە 1 -قىركۇيەكتەن باستاپ الا تاياق قايتارىلادى

نۇر-سۇلتان. قازاقپارات - بۇدان بۇرىن ىشكى ىستەر مينيسترلىگى پوليتسيا قىزمەتكەرلەرىنە الا تاياقتى قايتارۋ تۋرالى ماسەلە كوتەرگەن بولاتىن، دەپ حابارلايدى قازاقپارات ق ر ءى ءى م باسپا ءسوز قىزمەتىنە سىلتەمە جاساپ.

وسى جۇمىس شەڭبەرىندە جۇرتشىلىقتىڭ، جۇرگىزۋشىلەر وداعى مەن كولىك يەلەرىنىڭ پىكىرلەرىنە تالداۋ جۇرگىزىلدى. ولار تۇنگى ۋاقىتتاردا جانە جول ناشار كورىنەتىن شاقتا، اسىرەسە جول- كولىك وقيعالارى كەزىندە كولىك قۇرالدارىن جولدان الۋ جانە كەپتەلىستەردە، سونداي- اق جول- جوندەۋ جۇمىستارىنا بايلانىستى ۋاقىتشا جول قوزعالىسىنا وزگەرتۋ كەزىندە بۇل قاجەت دەپ ەسەپتەيدى.

سونداي-اق باعدارشامدار ىستەن شىققاندا، تابيعي جانە تەحنوگەندىك سيپاتتاعى توتەنشە جاعدايلاردا جانە ولاردىڭ سالدارلارىنىڭ الدىن الۋ كەزىندە جول قوزعالىسىن رەتتەۋ ءۇشىن الا تاياقتاردى قايتارۋ ماقساتقا ساي دەگەن پىكىردە.

جۇرتشىلىق رەتتەۋشىنىڭ نۇسقاۋلارى جول قوزعالىسىنا قاتىسۋشىلارعا ءتيىمدى جانە پوليتسيا قىزمەتكەرلەرىنىڭ قاۋىپسىزدىگىن ارتتىرادى دەپ اتاپ ءوتتى.

سونىمەن بىرگە ءى ءى م جول قوزعالىسى ءتارتىبىن بۇزۋ فاكتىلەرىن انىقتاعان كەزدە قولدانىستاعى ءتارتىپ، ياعني نۇسقاۋ قول ارقىلى بەرىلەدى نەمەسە ارنايى جارىق-دىبىس سيگنالدارى جانە داۋىستاعىش قوندىرعى ارقىلى بەرىلەدى، بۇل رەتتە الا تاياق قولدانىلمايدى.

الا تاياقتاردى قايتارۋ زاڭنامالىق وزگەرىستەر مەن ولاردى ساتىپ الۋعا بيۋدجەتتىك شىعىنداردى قاجەت ەتپەيدى.

اعىمداعى جىلعى 1 -قىركۇيەكتەن باستاپ الا تاياقتاردى ەنگىزۋ جوسپارلانۋدا.