مىرزاعالي ايتجانوۆ: يندونەزيادا جالپى كوماندالىق 1-ورىن الۋعا تىرىسامىز
«قاڭتاردىڭ بەسى وقۋ-جاتتىعۋ جيىنىن باستاپ كەتتى. جيىن قاڭتاردىڭ 23 ىنە دەيىن جالعاسادى. اقپاننان باستاپ حالىقارالىق جارىستار باستالادى. ال بيىلعى ماۋسىمنىڭ ەڭ نەگىزگى ءتۋرنيرى -يندونەزيادا وتەتىن ازيا ويىندارى بولماق. بۇل جارىستا جالپى كوماندالىق ءبىرىنشى ورىن الۋعا تىرىسامىز. باستى قارسىلاستارىمىز وزبەكستان قۇراماسى»، - دەپ اتاپ ءوتتى ۇلتتىق قۇرامانىڭ باس باپكەرى.
ونىڭ اتاپ وتۋىنشە، وقۋ-جاتتىعۋ جيىنىنا قۇرامانىڭ بەلدى بوكسشىلارى قاتىسۋدا، ولار ۆاسيلي لەۆيت، ادىلبەك نيازىمبەتوۆ، قايرات ەراليەۆ جانە تاعى باسقالارى.
«تەك قانا جانىبەك ءالىمحان ۇلى كەلە المادى. ول ۋاقىتشا مانسابىن توقتاتاتىنىن ايتتى. جالپى قازىر بىزدە ءتورت قۇراما بار. بارلىق بوكسشىلارىمىزدى جارىستارعا الىپ بارىپ، اراسىنان ەڭ مىقتىلارىن ازيا ويىندارىنا قاتىستىرامىز. يندونەزياعا تەك جۇلدەگە تالاساتىن بوكسشىلار عانا بارادى»، - دەدى مىرزاعالي ايتجانوۆ.
