كەلەر جىلدىڭ 1- شىلدەسىنەن زەينەتكە شىعاتىن ايەلدەر تولەمدى ەكى ەسە كوپ الادى

استانا. قازاقپارات - 2018-جىلدىڭ 1- شىلدەسىنەن زەينەتكەرلىككە شىعاتىن ايەلدەردىڭ زەينەتاقىسى 2 ەسەگە ۇلعايتىلادى.

بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات.

«وزدەرىڭىزدە بىلەسىزدەر، 2014-جىلى زەينەتاقىنى ودان ارى جاڭعىرتۋ جونىندەگى تۇجىرىمداما، زاڭ قابىلداندى. سوعان سايكەس، 2018-جىلدىڭ 1- قاڭتارىنان باستاپ زەينەت جاسىن ارتتىرۋ باستالادى. ءبىراق ءبىز ايەلدەردىڭ زەينەت جاسىن 63 كە دەيىن ارتتىرۋدى 10 جىل ىشىندە، 2018-جىلدان 2028-جىلعا دەيىن جۇرگىزەمىز. ياعني، ايەل ازاماتشالارىمىز 2028-جىلى عانا 63 جاسقا تولعاندا زەينەتكەرلىككە شىعادى»، - دەدى تامارا دۇيسەنوۆا.

ونىڭ ايتۋىنشا، 2018-جىلدىڭ 1- شىلدەسىنەن باستاپ ەلىمىزدە زەينەتاقىنىڭ بازالىق دەڭگەيى كوتەرىلەدى.

«سوندىقتان وعان ىلىككەن ازاماتشالاردىڭ بازالىق زەينەتاقىلارى 2 ەسەگە ۇلعايتىلىپ بەرىلەدى. ياعني، ازاماتشالارىمىز زەينەتاقى كولەمىنەن ۇتاتىن بولادى. ارى قاراي ايەلدەردىڭ زەينەت جاسىن 63 كە دەيىن ۇلعايتۋ ءۇشىن جارتى جىلدان قوسىلىپ وتىرادى»، - دەدى ول.

ءمينيستردىڭ سوزىنە قاراعاندا، 2010-جىلى قۇرىلعان الەۋمەتتىك ساقتاندىرۋ قورىنان دۇنيەگە بالا اكەلگەن انالارعا جاردەماقى بەرىلىپ كەلەدى.

«دۇنيەگە بالا اكەلگەن 150 مىڭعا جۋىق انا ءوز جالاقىلارىنىڭ 40 پايىزىن اتالعان قوردان الاتىن. 2016-جىلى اتالعان قوردان جاردەماقى الاتىن انالاردىڭ سانى 255 مىڭعا جەتتى. ياعني 105 مىڭعا ارتىپ وتىر. دەمەك، ءبىز وسى ۋاقىتتا انالاردى جۇمىسقا تارتۋعا كوپ كوڭىل بولدىك دەگەن ءسوز. قازىرگى ۋاقىتتا جۇمىس ىستەپ جۇرگەن انالاردىڭ سانى كوبەيۋدە»، - دەدى دۇيسەنوۆا.

اۆتور: مارلان جيەمباي