پاۆلودارلىق ايەل ا ق ش- تا وقىپ كەلگەن قىزى ءۇشىن 1 ميلليون قالىڭمال سۇراپ وتىر
ۇلتتىق ارناداعى «ايەل باقىتى» باعدارلاماسىندا قوناقتا بولعان ساليدا حانىمنىڭ قىزى مايگۇل اياتبەك قىزى بولاشاق باعدارلاماسىنىڭ تۇلەگى، بۇگىندە «استانا وپەرا» تەاترىندا جۇمىس ىستەيدى.
ساليدا حانىم قىزىنا نەلىكتەن ءبىر ميلليوننان كەم ەمەس قالىڭمال سۇرايتىنىن ايتىپ بەردى.
«قالىڭمال بەرۋ قۇدالاردىڭ اراسىنداعى كەلىسىم، سىيلاستىق دەپ ويلايمىن. ءار اتا-انا ءوز بالاسىن وقىتىپ، وعان جاقسى تاربيە بەرىپ، اياعىنا تۇرعىزعاننان كەيىن، ءبىر جاعىنان ول اقشانى كوپ دەپ تە ويلامايمىن. نەگە دەسەڭىز، قىز بالانى بەرگەننەن كەيىن ونىڭ مىندەتتى تۇردە جاساۋىن بەرۋ كەرەك. كيىم- كەشەگىن بەرۋ كەرەك. بىلاي قاراساڭىز، قازىرگى زاماندا ودان دا كوپ كەتىپ قالۋى مۇمكىن. ءبىر ميلليون اقشا قازىرگى كەزدە تۇك تە ەمەس. شىندىق سولاي. ءبىر گارنيتۋر كەلەدى مە كەلمەي مە؟ جاقسى جيھاز قىمبات تۇرادى»، - دەيدى قىزدىڭ اناسى.
ستۋدياداعى ساراپشى ومار جالەلدىڭ پىكىرىنشە، ساليدا حانىمنىڭ تالابى دۇرىس.
«كەز- كەلگەن زاتتى ساتىپ الاسىز، باعالى زات قۇندى بولادى. باعاسىز زات ارزان تۇرادى. قازاق «ارزاننىڭ جىلىگى ماي تاتىمايدى» دەگەن. نەگە قازىر قىزدارىمىز ارزانداپ كەتتى؟ ويتكەنى قىزدارىمىزدى قۇندامايمىز، قازىر قازاقتىڭ قىزدارى ارزان بولعاننان كەيىن ۇيلەنگەن ءۇش نەكەنىڭ ەكەۋى اجىراسىپ جاتىر»، - دەگەن وي قوزعادى ساراپشى.
الايدا، ومار جالەل بۇل ومىردە قاتىپ قالعان قاعيدانىڭ جوق ەكەنىن كەسىپ ايتتى.
«تەڭىن تاپسا، تەگىن بەر دەپ قازاق ايتادى. قازاق قالىڭمالىن تولەي الماعان جىگىتتى «كۇش كۇيەۋ» دەپ اتاپ، كۇيەۋگە قالىڭمالىن كۇشىمەن وتەتكىزگەن»، - دەيدى ول.
