قازاقستاندىق جانە پولشالىق بيزنەسمەندەر 1 ميلليارد دوللارلىق كەلىسىمشارتقا قول قويادى - نۇرسۇلتان نازاربايەۆ

بۇل تۋرالى پولشا پرەزيدەنتى اندجەي دۋدامەن ەكىجاقتى كەلىسسوز ناتيجەسى بويىنشا بىرلەسكەن مالىمدەمەدە نۇرسۇلتان نازاربايەۆ ايتتى. قازاقستان باسشىسى وسىمەن پولشاعا ءۇشىنشى رەت كەلىپ وتىرعانىن اتاپ ءوتتى. ەلباسى قازاقستان مەن پولشا اراسىندا تاريحي جانە ەكونوميكالىق قاتىناستاردا ۇقساستىق كوپ دەپ سانايدى. «ءبىز پرەزيدەنت مىرزامەن (اندجەي دۋدامەن) ەكىجاقتى كەلىسسوز بارىسىندا ساياسي جاعدايدى جەكە تالقىلادىق، ودان ءارى ەكونوميكالىق ماسەلەلەردى قارادىق. ەرتەڭ بيزنەس- فورۋم وتەتىنىن حابارلاعىم كەلەدى. قازاقستاننان 100 دەن استام بيزنەسمەن كەلدى. قازاقستاندىق جانە پولشالىق بيزنەسمەندەر، مەنىڭ دەرەكتەرىم بويىنشا، جالپى سوماسى 1 ميلليارد دوللارعا ەكىجاقتى ەكونوميكالىق كەلىسىمشارتتارعا قول قويۋعا نيەتتى»، - دەپ حابارلادى نۇرسۇلتان نازاربايەۆ. پرەزيدەنت قازاقستاندا قازىرگى ۋاقىتتا 40 مىڭنان استام پولياك تۇراتىنىن، ولار ەكى ەل اراسىنداعى «دوستىق كوپىرى» بولىپ تابىلاتىنىن ەسكە سالدى. «ولاردىڭ قازاقستاندا تىرشىلىك كەشكەنىنە بيىل 80 جىل تولادى. ءبىزدىڭ كونستيتۋتسيا جانە زاڭدارىمىز بويىنشا ولار ەل ازاماتتارىمەن تەڭ قۇقىلى. بەيبىتشىلىك پەن تۇراقتىلىقتا ءومىر ءسۇرىپ جاتقان 130 ەتنوستىڭ ءبىرى. ولاردىڭ بارلىعىنا مەملەكەت قولداۋ كورسەتەدى»، - دەپ قوستى ق ر پرەزيدەنتى.