شەت ەلدەن 1 ميلليون توننا ەت الاتىن قىتاي مەن رەسەي نارىعى قازاقستان شارۋالارى ءۇشىن ۇلكەن مۇمكىندىك
بۇل تۋرالى بۇگىن KazMeatAstana-2016 اتتى حالىقارالىق فورۋمدا ق ر اۋىل شارۋاشىلىعى ۆيتسە- ءمينيسترى گۇلميرا يسايەۆا ءمالىم ەتتى.
«وتاندىق وندىرۋشىلەر العاش رەت جاقىن كورشىلەرگە ەت تاسىمالداي باستادى. بىلتىر قازاقستاندىق كاسىپكەرلەر 16 مىڭ توننا ەت پەن ەت ونىمدەرىن رەسەيگە جونەلتتى. ءبىراق ول از، ماسەلەن، رەسەي مەن قىتاي وزگە ەلدەردەن 1 ميلليون توننا ەتتى شەتەلدەن ساتىپ الادى. بۇل ءبىز ءۇشىن ۇلكەن مۇمكىندىك، وسى نارىقتى ءبىزدىڭ ەت وندىرۋشىلەر باسۋى كەرەك»، - دەپ اتاپ ءوتتى ول.
ونىڭ ءسوزى بويىنشا، قازىرگى ۋاقىتتا قىتاي ازىق- تۇلىك قاۋىپسىزدىگىنىڭ جاڭا ستاندارتتارىن ەنگىزۋدە. وسىعان بايلانىستى، قىتايدا ورگانيكالىق ازىق- تۇلىككە دەگەن سۇرانىس ەسەلەپ ارتپاق.
«قازاقستاندا مال جايىلىمى تابيعي تۇرعىدا ىسكە اسادى. مال باسى دا جەتەرلىك دەڭگەيدە كوبەيتىلۋدە، ينفراقۇرىلىمدار دامىتىلۋدا»، - دەيدى ۆيتسە- مينيستر.
ايتا كەتەيىك، استاناداعى «КazMeatAstana-2016» حالىقارالىق فورۋمىنا 14 ەلدەن 300-گە تارتا قاتىسۋشى كەلگەن. ولاردىڭ ىشىندە قىتاي، كانادا، يتاليا، جاڭا زەلانديا، تۇركيا ەلدەرىنىڭ وكىلدەرى بار.
اۆتور: جاسۇلان جولدىبايەۆ
