اۋەجايدا شەكاراشىنى شالىپ قۇلاتقان سپورتشىعا 1 ميلليون تەڭگە ايىپپۇل سالىندى

الماتى. قازاقپارات - الماتى قالاسىنىڭ تۇركىسىب اۋداندىق سوتىندا ازامات س. بيمۋرزينگە قاتىستى قىلمىستىق ءىستى قاراۋ اياقتالدى.

بۇل تۋرالى بۇگىن الماتى قالالىق سوتىنىڭ باسپا ءسوز قىزمەتىنەن حابارلادى.

 س. بيمۋرزينگە سوت الدىندا ق ر قىلمىستىق كودەكسىنىڭ 379-بابىنىڭ 1-تارماعى (بيلىك وكىلىنە باعىنباۋشىلىق) جانە 380-بابىنىڭ 1-تارماعى (بيلىك وكىلىنە زورلىق- زومبىلىق كورسەتۋ) بويىنشا ۇكىم شىعارىلدى.

سوت ۇكىمى بويىنشا س. بيمۋرزين ق ر ق ك 379-بابىنىڭ 1-تارماعى بويىنشا قىلمىستىق تەرىس قىلىق جاساعانى جانە ق ر ق ك 380-بابىنىڭ 1-تارماعى بويىنشا قىلمىس جاساعانى ءۇشىن كىنالى دەپ تابىلدى.

ق ر ق ك 58-بابىنىڭ 2-تارماعى نەگىزىندە قىلمىستىق قۇقىقبۇزۋشىلىق جيىنتىعى بويىنشا بيمۋرزينگە 500 ايلىق- ەسەپتىك كورسەتكىش كولەمىندە (991000 تەڭگە) ايىپپۇل تۇرىندە جازالاۋ شاراسى تاعايىندالدى.

سوت انىقتاعانىنداي، 2015 -جىلدىڭ 7 -جەلتوقسانىندا ساعات 12 لەر شاماسىندا س. بيمۋرزين الماتى حالىقارالىق اۋەجايىنىڭ VIP ۇشىپ كەتۋ زالىنا كەلىپ، وتكىزۋ پۋنكتىنىڭ رەجىمدىك ايماعىنا وتۋگە ارەكەت جاساعان. وسى شاقتا، ونى شەكارالىق باقىلاۋ ءبولىمىنىڭ باقىلاۋشىسى كىشى سەرجانت ن. ب. توقتاتادى. ويتكەنى، ونىڭ رەجىمدىك ايماقتا بولماۋى كەرەك.

بيلىك وكىلىنىڭ رۇقسات قاعازىن نەمەسە وتىرعىزۋ تالونىن كورسەتۋ تۋرالى زاڭدى تالاپتارىنا بيمۋرزين باعىنباعان. ءسويتىپ، كىشى سەرجانتتىڭ جانىمەن ءتولقۇجاتتىق باقىلاۋ سىزىعىنىڭ ارعى جاعىنا ءوتىپ، اۋەجايدىڭ رەجىمدىك ايماعىنا باعىت الادى.

بيلىك وكىلى رەجىمدىك ايماقتى بوساتۋ جونىندە تالاپ ەتكەندە س. بيمۋرزين بيلىك وكىلى ن. ب. قارسى كۇش قولدانىپ، ونى ۇستاپ، شالىپ قۇلاتقان.

سوت ۇكىمى ءالى كۇشىنە ەنگەن جوق.

اۆتور: جاپپاربەرگەن ايبوتا