پەتروپاۆلدا اۋماعى 1 مىڭ شارشى مەترلىك جارىق ديودتى شاڭىراق ورناتىلدى - فوتو

None
None
پەتروپاۆل. قازاقپارات - پەتروپاۆلدا ناۋرىز مەرەكەسىن تويلاۋعا دايىندىق قىزۋ ءجۇرىپ جاتىر. ورتالىق الاڭدا اۋماعى 1 مىڭ شارشى مەتر بولاتىن جارىق ديودتى شاڭىراق ورناتىلدى.

ول 100 مىڭ جارىق ديودتى شامنان تۇرادى.

«قالالىقتارعا مەرەكەلىك كوڭىل- كۇي سىيلاۋ ءۇشىن ورتالىق الاڭدا العاش رەت ەتنواۋىل پايدا بولىپ، تاقىرىپتىق الاڭدار جۇمىس ىستەۋدە. التىباقاندار ورناتىلدى. بۇل ەتنواۋىل 2014 - جىلى پاريج قالاسىندا EXPO 2017 دۇنيەجۇزىلىك امبەباپ كورمەسىنىڭ تۋىن تاپسىرۋ كەزىندە قازاقستاندى لايىقتى تانىستىرعان. ەتنواۋىل 7 كيىز ۇيدەن تۇرادى. بيىكتىگى ەكى مەترگە دەيىن جەتەتىن «ساۋكەلە» اتتى كىشى ساۋلەت ۇلگىلەرى دە وتە قىزىقتى»، - دەپ اقپاراتتاندىردى پەتروپاۆل قالالىق ىشكى ساياسات ءبولىمىنىڭ باسشىسى دينارا راقىمجانوۆا.

ساۋلەت ونەرى قازاقستان حالقىنىڭ بىرلىگىن، ۇلتارالىق كەلىسىم مەن تولەرانتتىلىقتى بەينەلەيتىن شاڭىراق ۇلگىسىندەگى جارىقديودتى شاتىر تۇرىندە ءتامامدالعان.

ەتنواۋىلدا قالا تۇرعىندارى پالاۋ، ءشاي، باۋىرساق، ناۋرىز كوجەدەن ءدام تاتا الادى. بارلىعى 2500 كەلى پالاۋ، 500 ليتردەن استام ناۋرىز كوجە جانە 700 كەلىگە جۋىق باۋىرساق دايىندالادى. بۇل مەرەكەدە قوناقتارعا ءتاتتى جەگىزۋ جاقسى توسىن سىي مەن قالىپتاسقان داستۇرگە اينالدى. وسى مەرەكەدە ديامەترى 3 مەتر بولاتىن «جايلاۋ» اتتى تورت دايىندالادى.

مەرەكەلىك شارالاردا ەتنواۋىلدا قازاقستان حالىقتارىنىڭ داستۇرلەرى مەن سالتتارىن كورسەتۋ، «ناۋرىز كوجە شوۋ» بايقاۋىن وتكىزۋ جوسپارلانىپ وتىر. سونداي-اق قالا تۇرعىندارى مەن قوناقتارى ءۇشىن ساندىك- قولدانبالى شىعارماشىلىق بۇيىمدارىنىڭ كورمە- ساتىلىمى وتكىزىلەدى.







سوڭعى جاڭالىقتار