تۇكىرگەنى ءۇشىن ەلوردالىقتارعا 19 ميلليون تەڭگە ايىپپۇل سالىندى
بۇل تۋرالى ب ا ق وكىلدەرىنىڭ قاتىسۋىمەن وتكەن بريفينگىدە استانا قالالىق پ د جەرگىلىكتى پوليتسيا قىزمەتى باسقارماسىنىڭ باسشىسى ارمان ايتماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.
«جالپىعا ورتاق پايدالانىلاتىن ورىنداردىڭ لاستانۋىنا بايلانىستى قۇقىق بۇزۋشىلىقتاردىڭ جولىن كەسۋ بويىنشا جۇمىس جۇرگىزىپ كەلەمىز. اسىرەسە، قوعامدىق ورىنداردا جانە كوشەلەردە تۇكىرىپ جاتقان ازاماتتارعا نازار اۋدارىلادى. جىل باسىنان بەرى تۇكىرگەنى ءۇشىن 1200 ازاماتقا 19 ميلليون تەڭگە ايىپپۇل سالىندى. بۇگىندە ونىڭ 5 ميلليون تەڭگەسى نەمەسە %28 ءوندىرىلدى»، - دەدى ارمان ايتماعامبەتوۆ ب ا ق وكىلدەرىنىڭ ساۋالىنا جاۋاپ بەرە وتىرىپ.
سپيكەردىڭ ايتۋىنشا، تۇكىرۋ فاكتىلەرى ەلورداداعى بازارلاردىڭ ماڭايىندا ءجيى تىركەلەدى. ارمان ايتماعامبەتوۆ ولاردىڭ بارلىعى بەينەكامەرالاردىڭ كومەگىمەن انىقتالىپ جاتقانىن ءمالىم ەتتى.
ايتا كەتەيىك، بۇگىندە استانا قالاسىنىڭ اۋماعىندا 14 مىڭنان استام كامەرا بار. الداعى ۋاقىتتا ولاردىڭ سانىن ۇلعايتۋ جوسپارلانىپ وتىر.
قوسا كەتسەك، بىلتىر جەلتوقسان ايىندا وتاندىق تەلەارنالاردىڭ بىرىنە سۇحبات بەرىپ تۇرىپ، جەرگە تۇكىرگەن ءماجىلىس دەپۋتاتى ەرلان سايروۆ ايىپپۇل تولەگەن ەدى.
