قاراعاندى اۋەجايىنا قىتايدان جەتكىزىلگەن 19 توننا جۇك كەدەندىك باقىلاۋدان تىس وتكىزىلمەك بولعان
مۇنى «اۋەجاي- قاراعاندى» كەدەن بەكەتىنىڭ قىزمەتكەرلەرى انىقتادى. بۇل تۋرالى مەملەكەتتىك كىرىستەر كوميتەتى ءمالىم ەتتى، دەپ حابارلايدى قازاقپارات.
«ۇسىنىلعان تاسىمالداۋ قۇجاتتارىن تالداۋ بارىسىندا كەدەندىك تاسىمالداۋشى حالىقارالىق پوشتا جونەلتىلىمدەرى تۇرىندە جالپى ماسساسى 19 توننا شوعىرلاندىرىلعان ەكسپرەسس جۇك تاۋارىن مالىمدەگەنى انىقتالدى.
كەدەندىك رەسىمدەۋ رەگلامەنتىنە سايكەس حالىقارالىق پوشتا جونەلتىلىمدەرى كەدەندىك باقىلاۋ نىساندارىنان جەڭىلدەتىلگەن تارتىپپەن وتەدى. كوممەرتسيالىق جۇكتەر كەدەندىك باقىلاۋدىڭ بارلىق نىساندارىن قولدانا وتىرىپ، كەدەندىك رەسىمدەۋدەن وتەدى. تيىسىنشە، حالىقارالىق پوشتا جونەلتىلىمدەرى تۇرىندەگى كوممەرتسيالىق جۇكتى دەكلاراتسيالاي وتىرىپ، دەكلارانت كەدەندىك باقىلاۋدان جالتارادى. بۇل - ەەك شەشىمدەرىن بۇزۋ»، - دەلىنگەن مالىمدەمەدە.
قازىر دۇرىس دەكلاراتسيالانباعان تاۋارلارعا قاتىستى كەدەندىك تەكسەرۋ جۇرگىزىلىپ جاتىر. بەلگىلى بولعانىنداي، ونىڭ ىشىندە قول ساعاتتارى، كومپيۋتەرلىك پەرنەتاقتا، بالالارعا ارنالعان جانە باسقا دا زاتتار بار.
ماتەريالدار قاراعاندى وبلىسى بويىنشا ەكونوميكالىق تەرگەۋ دەپارتامەنتى اۆتوماتتاندىرىلعان اقپاراتتىق دەرەكتەر قورىنىڭ ەسەبىنە تىركەلگەن.
قاراعاندى وبلىسى بويىنشا مەملەكەتتىك كىرىستەر دەپارتامەنتى ق ر كەدەن كودەكسىنىڭ 34-بابىنا سايكەس، ەاەو كەدەندىك اۋماعىنا اكەلىنەتىن تاۋارلار وداقتىڭ كەدەندىك شەكاراسىنان وتكەن ساتتەن باستاپ كەدەندىك باقىلاۋدا بولاتىنىن ەسكە سالادى.
رەداكتور گۇلنۇر عازيز قىزى
