نۇر-سۇلتاندا الاياقتىق جاساعان 19 جاستاعى بانك قىزمەتكەرى ۇستالدى

Polisia.kz مالىمەتىنشە، بيىل 28-قاڭتاردا قاراعاندى قالاسى پوليتسيا دەپارتامەنتى وڭتۇستىك- شىعىس پوليتسيا بولىمىنە 50 جاستاعى تۇرعىننان ارىز تۇسكەن.
«جابىرلەنۋشى ءوزىنىڭ جەكە دەرەكتەرىن بەلگىسىز بىرەۋ پايدالانىپ، ونىڭ اتىنا 2,1 ميلليون تەڭگە نەسيە رەسىمدەگەنىن ايتقان. بۇل فاكت بويىنشا قىلمىستىق كودەكستىڭ 190-بابى («الاياقتىق») بويىنشا قىلمىستىق ءىس قوزعالدى. جابىرلەنۋشىنىڭ اتىنا كرەديت نۇر- سۇلتانداعى بانكتەردىڭ بىرىندە راسىمدەلگەنى بەلگىلى بولدى» ، دەپ جازىلعان حابارلامادا.
پوليتسەيلەر بۇل قىلمىسقا ءوتىنىش بەرۋشىنىڭ دەرەكتەرىنە قول جەتكىزگەن ادامنىڭ قاتىسى بار دەپ قورىتىندى جاساعان.
«20-ساۋىردە جەدەل- ىزدەستىرۋ شارالارى بارىسىندا كريمينالدى پوليسيا قىزمەتكەرلەرى ەلوردادا 19 جاستاعى تۇرعىندى ۇستادى. ول كىناسىن تولىق مويىندادى. كۇدىكتى جابىرلەنۋشىگە كرەديت راسىمدەلگەن قارجى مەكەمەسىنىڭ مەنەدجەرى ەكەنى بەلگىلى بولدى»، دەپ جازىلعان حابارلامادا.
سوتقا دەيىنگى تەرگەۋ بارىسىندا پوليتسەيلەر ۇستالعان بانك قىزمەتكەرىنىڭ تاعى دا وسىنداي 18 قىلمىسقا قاتىسى بارىن انىقتادى. زارداپ شەككەن تۇرعىندار رەسپۋبليكانىڭ ءارتۇرلى وڭىرىندە تۇرعان. كۇدىكتىنىڭ ارەكەتىنەن كەلگەن شىعىن مولشەرى انىقتالىپ جاتىر.