ەلوردالىق ەكى بويجەتكەن شەتەلدىك «كۇيەۋ» جىگىتتەرگە 19 ميلليون تەڭگە اۋدارعان

نۇر-سۇلتان. قازاقپارات - نۇر-سۇلتان قالاسىنىڭ پوليتسياسىنا ەكى ايدىڭ ىشىندە ينتەرنەت- الاياقتىق فاكتىلەرى بويىنشا ەكى ءوتىنىش كەلىپ تۇسكەن، دەپ حابارلايدى قازاقپارات ەلوردالىق پوليتسيا دەپارتامەنتىنە سىلتەمە جاساپ.

جابىرلەنۋشىلەردىڭ تۇسىندىرۋىنشە، ولار Facebook، Mail.ru الەۋمەتتىك جەلىلەرىندە شەتەلدىك ازاماتتارمەن تانىسىپ، بىرنەشە اي بويى رومانتيكالىق حات جازىسقان. ايەلدەردىڭ سەنىمىنە ابدەن كىرىپ العان الاياقتار بىتىمگەرلىك ميسسيا جاسايمىز دەگەن سىلتاۋمەن اۋديو نەمەسە بەينەبايلانىسقا شىقپاي، تەك ءتولقۇجات كوشىرمەسىن جىبەرگەن. حات الماسۋ كەزىندە اڭعال بويجەتكەندەر ەر ادامداردىڭ قازاقستانعا كەلىپ، ولاردى باسقا ەلگە الىپ كەتەتىنە سەنىپ، «جىگىتتەرىنە» ۇلكەن سومادا اقشا جىبەرگەن.

«تۇرمىسقا شىعۋدى ۇسىنعان الاياقتار بويجەتكەندەردەن مەملەكەتتىك باج تولەۋ، ءتولقۇجاتتى جاڭارتۋ، ۆيزاعا تاپسىرىس بەرۋ سياقتى ماسەلەلەردى شەشۋ ءۇشىن قاجەتتى سوما جىبەرۋدى سۇراعان. ەر ادامداردىڭ ىزگى نيەتىنە سەنگەن جابىرلەنۋشىلەر حالىقارالىق اقشا اۋدارۋ قىزمەتى ارقىلى سۇراعان سومالارىن جىبەرىپ وتىرعان. اقشانى قولعا تۇسىرگەن كۇدىكتىلەر جەلىدەن شىعىپ كەتىپ، ودان كەيىن بايلانىسقا شىقپاعان. شىعىن سوماسى ءبىر وقيعادا - 13 ميلليون تەڭگەنى، ەكىنشى وقيعادا - 6 ميلليون تەڭگەنى قۇرادى»، - دەپ حابارلادى باسپا ءسوز قىزمەتىنەن.

اتالعان فاكتىلەر نەگىزىندە ق ر قىلمىستىق كودەكسىنىڭ 190-بابى بويىنشا قىلمىستىق ءىس قوزعالدى. وقيعاعا قاتىسى بار تۇلعالاردى انىقتاۋ بويىنشا جەدەل-ىزدەۋ شارالارى جۇرگىزىلۋدە.