تەلەارنادان «قازاق حاندىعى» تەلەحيكاياسى 19 - ناۋرىزدا كورسەتىلەدى
ناۋرىز مەرەكەسىنە وراي 19 - ناۋرىزدا «31 - تەلەارنادا» ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» ا ق جانە «Centaurus Rustem Abdrashev production» ج ش س- نىڭ قاتىسۋىمەن تۇسىرىلگەن «قازاق حاندىعى» تاريحي سەريالىنىڭ تەلەۆيزيالىق كورسەتىلىمى باستالادى.
بۇل اۋقىمدى تاريحي جوبانىڭ اۆتورى - ق ر پرەزيدەنتى ن. ءا. نازاربايەۆ. فيلمنىڭ سسەناريى ءىلياس ەسەنبەرليننىڭ «الماس قىلىش» رومانىنىڭ جەلىسى بويىنشا جازىلعان. فيلمنىڭ رەجيسسەرى - قازاقستان رەسپۋبليكاسىنىڭ ەڭبەك سىڭىرگەن قايراتكەرى، كينورەجيسسەر، سسەناريست جانە سۋرەتشى رۇستەم ابدىراشيەۆ.
- حيكايانىڭ كينو نۇسقاسى - «الماس قىلىش» فيلمى كەيبىر وتانداستارىمىزدىڭ تاريحقا دەگەن قىزىعۋشىلىعىن وياتتى. «قازاق حاندىعى» سەريالىندا فيلمگە كىرمەي قالعان تارتىمدى ەپيزودتار مەن قىزىقتى وقيعالار وتە كوپ، سوندىقتان دا بۇل حيكايا كورەرمەندەردىڭ كوڭىلىنەن شىعاتىنىنا كۇمانىم جوق، - دەدى رەجيسسەر رۇستەم ابدىراشيەۆ.
«قازاق حاندىعى» تاريحي حيكاياسىنىڭ ءبىرىنشى ءبولىمىن وسى جەكسەنبىدە، ناۋرىزدىڭ 19- كۇنى ساعات 22:00-دە «31 - ارنادان» تاماشالاۋعا بولادى.
ەستەرىڭىزگە سالا كەتسەك، «قازاق حاندىعى» سەريالىنىڭ كينو نۇسقاسى - «الماس قىلىش» فيلمىنىڭ تۇساۋكەسەرى بىلتىرعى جىلى قازاقستان تاۋەلسىزدىگىنىڭ 25 جىلدىعىن اتاپ ءوتۋ كۇندەرى استانا جانە الماتى قالالارىندا وتكەن بولاتىن. 2017 -جىلى 5 - قاڭتاردا جالپى ۇلتتىق پروكاتقا شىققان اتالمىش تولىقمەتراجدى كوركەم فيلم، قازاقستاندىق پروكاتتا 72 ميلليوننان استام قارجى جيناپ، كوشباسشىلار قاتارىنان كورىندى. جالپى العاندا 2,5 مىڭنان استام سەانس، ونىڭ 60 پايىزى قازاق تىلىندە، ال 40 پايىزى ورىس تىلىندە كورسەتىلدى.
فيلمنىڭ ءتۇسىرىلىم جۇمىستارى الماتى جانە الماتى وبلىسىندا وتكەن. ءتۇسىرىلىمنىڭ ءبىر بولىگى «قازاق فيلمنىڭ» پاۆيلوندارىندا قۇرىلعان دەكوراتسيالاردا، سونىمەن قاتار كينوستۋديانىڭ اۋماعىندا سۋرەتشىلەر تۇرعىزعان شايبانشاھتىڭ سارايىندا وتكەن. فيلمدى جاساۋعا 500-دەن استام ادام جۇمىلدىرىلعان. ءتۇسىرىلىم بەس ايعا سوزىلدى.
فيلم تۋرالى: ⅩⅤ عاسىردىڭ ورتا تۇسى. قارا تەڭىز جاعالاۋىنان موڭعولياعا دەيىنگى ەۋرازيا كەڭىستىگىندە ءبىر كەزدە زور قۋاتتى يمپەريا بولعان التىن وردا قۇلاعاننان كەيىن بىرنەشە جەكە حاندىقتار قۇرىلدى. ولاردىڭ ىشىنەن قازىرگى قازاقستاننىڭ اۋماعىن جايلاپ جاتقان اق وردا ەرەكشەلەندى. اق وردا بيلىگى شىڭعىس حاننىڭ نەمەرەسى، جوشىنىڭ ۇلكەن ۇلى وردا ەجەننىڭ اۋلەتىنە تيەسىلى بولدى. ارادا ۋاقىت وتە كەلە شايبانيتتەردىڭ كىشى تارماعىنان شىعاتىن ءابىلقايىر ءوز بيلىگىن كۇشەيتىپ، جەكە حاندىق قۇردى. ول كوشپەندىلەرگە قاتىگەز، اياۋسىز ساياسات ۇستانعان بولاتىن.
1460 -جىل. وردا ەجەننىڭ ۇرپاقتارى- كەرەيمەن جانىبەكتىڭ اينالاسىنا بىرىككەن ونداعان مىڭ كوشپەندىلەر اقساقالدار كەڭەسىندە شەشىم قابىلداپ، ءابىلقايىردان ءبولىنىپ شىعادى. سۇلتاندار موعولستاننىڭ شەكاراسىنا دەيىن جەتكەندە، جەرگىلىكتى بيلەۋشى ەسەن- بۇعا ولارعا قونىس بەرۋگە كەلىسەدى. ەسىمى اڭىزعا اينالعان ابىز اسان قايعى دا كوشكە ىلەسىپ، ءبولىنىپ شىعۋعا سەبەپ بولعان وقيعالاردى جىرىنا قوسادى.
جانىبەك پەن كەرەي ءابىلقايىردىڭ حاندىعىنان ءبولىنىپ، ءوز ۇلىستارىن قۇرۋعا بەكىندى. كەرەي مەن جانىبەككە قوسىلعان رۋلاردىڭ باسشى- بيلەرى قۇرىلتاي وتكىزەدى. ەڭ الدىمەن، جۇدىرىقتاي جۇمىلعان ىنتىماق كەرەك ەكەنىن ەسكەرگەن ولار كەرەيدى حان سايلاپ، قازاق حاندىعىنىڭ قۇرىلعانىن پاش ەتەدى.
قويۋشى- رەجيسسەرى: رۇستەم ءابدىراشوۆ
سسەناري اۆتورلارى: سماعۇل ەلۋباي، تيمۋر جاقسىلىقوۆ، رۇستەم ءابدىراشوۆ
قويۋشى سۋرەتشىلەرى: ءومىرزاق شمانوۆ، ءسابيت قۇرمانبەكوۆ، ەدىل ءنۇسىپوۆ پەن جاننات بايمۇقانوۆانىڭ قاتىسۋىمەن
قويۋشى وپەراتورلارى: ساپار كويچۋمانوۆ، الەكساندر پلوتنيكوۆ جانە اندرەي ماسلوۆ.
كومپوزيتورى: ءابىلقايىر ءابدىراش
باستى رولدە: قايرات كەمالوۆ، ەركەبۇلان دايىروۆ، دوسحان جولجاقسىنوۆ، يىسبەك ءابىلماجينوۆ، ايان وتەپبەرگەن، مەيىرعات امانگەلدين، نيازبەك شايسۇلتانوۆ، بەكبولات تىلەۋحان، ارمان قوجا، شۇعىلا ساپارعالي قىزى، مادينا ەسمانوۆا، قارلىعاش مۇحامەدجانوۆا، ىڭكار ءابدىراش، دىنمۇحامەد اقىموۆ جانە باسقالار.
