12:53, 17 - مامىر 2016 | GMT +5
رەسەيدە اۋىر جاراقات الىپ، كوز جۇمعان 19 جاستاعى بوكسشىنى قازاقستاندا جەرلەيدى
استانا. قازاقپارات - مي جاراقاتىن الىپ، قازا تاپقان بوكسشىنى قازاقستاندا جەرلەيدى. قايتىس بولۋ سەبەبىن ناقتى انىقتاعان سوڭ، اكەسى مۇردەنى وتانىنا الىپ كەلمەك. ماگادان وبلىستىق بوكس فەدەراتسياسى بار شىعىندى ءوز مويىندارىنا الماق، دەپ حابارلادى ИА MagadanMedia.
ۆالەري پوپەنچەنكو جۇلدەسىنە مەموريال-تۋرنير كەزىندە اۋىر جاراقات العان 19 جاستاعى بوكسشى ۆلاديسلاۆ شۋكين 10 كۇن جاساندى كومادا بولدى. جارىس الدىندا بوكسشى جان-جاقتى مەديتسينالىق تەكسەرۋدەن ءوتىپ، جارىسقا رۇسقات العان.
مامانداردىڭ ايتۋىنشا، ميىنداعى قاندى ىسىك جارىستىڭ ءبىرىنشى كۇنى نە ماگادانداعى تۋرنيرگە دەيىن بولۋى مۇمكىن. 16- مامىردا ومبىلىق بوكسشى ەس-ءتۇسسىز جاتقان كۇيى كوز جۇمعان. قازا بولۋ سەبەبى - مي جاراقاتى.
«قازىر ءولىمىنىڭ ناقتى سەبەبى انىقتالۋ ۇستىندە. شۋكيننىڭ اكەسى قازاقستاندا تۇرادى. سپورتشى دا سول جاقتا تۋعان. رەسىمدەۋدەن وتكەن سوڭ، ونى ەلىنە الىپ كەتەدى. بارلىق شىعىندى ماگادان وبلىستىق بوكس فەدەراتسياسى كوتەرەدى»، - دەدى ماگادان بوكس مەكتەبىنىڭ ديرەكتورى پەتر بۋرميستروۆ.
