تۇركيادا نارازىلىق شەرۋى كەزىندە قازا بولعاندار سانى 19 عا جەتتى

استانا. قازاقپارات - سارسەنبى كۇنى سيرياداعى وقيعالارعا تۇركيانىڭ كىرىسپەۋ ساياساتىنا قارسى نارازىلىق شارالارىنىڭ بارىسىندا وسىعان دەيىن زارداپ شەككەندەرمەن قوسا تاعى ەكى ادام قازا تاپتى، دەپ حابارلادى Hurriyet تۇرىك گازەتى.

وسىلايشا، نارازىلىق شارالارىنىڭ بارىسىندا قازا بولعانداردىڭ جالپى سانى 19 عا جەتتى.

جاقىندا تۇركيانىڭ دياربەكير، ماردين، سيرت، مۋش جانە باتمان پروۆينتسيالارىندا سيريانىڭ كوباني قالاسىندا بولىپ جاتقان وقيعالارعا تۇركيانىڭ كىرىسپەۋشىلىك ساياساتىنا قارسى نارازىلىق شارالارى باستالدى. كوبانيدىڭ كوپ بولىگى «يسلام مەملەكەتى» تەرروريستىك ۇيىمىنىڭ قاداعالاۋىنا ءوتتى.

سونىمەن بىرگە، نارازىلىق شارالارىنىڭ بارىسىندا تۇركيا پروۆينتسيالارىنىڭ ءبىرقاتارىندا مۋنيتسيپاليتەتتەردىڭ جىلجىمايتىن مۇلكى مەن جەكە بيزنەسىنە ايتارلىقتاي زيان كەلدى. نارازىلىق اكسيالارىنا نەگىزىنەن پروۆينتسيالاردىڭ كۋرد حالقى مەن كۋرديستان جۇمىسشىلار پارتياسىنىڭ جاقتاستارى قاتىسۋدا.