سول كەزدەگى ساياساتتىڭ قانداي ەكەنىن ىشتەي بىلەتىنمىن - ەلباسى 1991 -جىل تۋرالى

استانا. قازاقپارات - «تاۋەلسىزدىك تاعىلىمى» اتتى تەلەجوبا بارىسىندا مەملەكەت باسشىسى ەگەمەندىك العان العاشقى كەزدە سول كەزدەگى ساياساتتىڭ قانداي ەكەنىن ىشتەي ءبىلىپ، تىنىپ جۇرگەنىن ايتتى،

 دەپ حابارلايدى قازاقپارات.

ەلباسى تەلەجوبا باسىندا ءوز ۇزەڭگىلەستەرىنە العىس ايتىپ، «ەگەمەندىكتىڭ باسىنداعى قيىندىقتار مەن قازىرگى قۋانىشتى جانىندا جۇرگەن ازاماتتاردىڭ ايتقانى ءجون»، - دەدى. مەملەكەت باسشىسى قازاقستان تاۋەلسىزدىگىنىڭ العاشقى جىلىنداعى قيىندىقتار تۋرالى ءوز ويىن وسىلاي باستادى.

«ءبىز الدىمەن تاۋەلسىزدىك العانىمىزعا شاتتانىپ، قۋاندىق. سول ءبىر كەزەڭ ەلدىڭ بارىن قۋانتتى. ءبىز ارقامىزعا الاتاۋداي امانات ارقالادىق. ءبىر جاعىنان قۋانىش، ەكىنشى جاعىنان «الدا نە بولادى» دەگەن قورقىنىش بولدى. قاراپايىم حالىق كوز الدىنداعى نارسەنى عانا ويلادى دا، ءمان بەرمەدى. مەن بولسام، بۇرىننان ۇكىمەتتىڭ باسشىلىعىندا جۇرگەن اداممىن، ساياساتتىڭ قانداي ەكەنىن ىشىمنەن ءبىلىپ، قانشا قيىندىق بارىن ىشىمنەن ءبىلىپ، تىنىپ تۇرعان ادام بولدىم»، - دەدى مەملەكەت باسشىسى.

«سوندىقتان، ايتاتىن ءسوز كوپ. ونىڭ بارلىعىن مەن ەمەس، سىزدەر ايتساڭىزدار دەگەن تىلەگىم بار. ءارقايسىلارىڭىز ەسكە تۇسىرەتىن، جازىلماي جۇرگەن، ايتىلماي جۇرگەن نارسەلەر كوپ بولدى. سەبەبى، قيىن كەزدەردە ءار ادام ءوزىنىڭ ورنىندا ءبىر ماسەلەنى شەشىپ وتىرادى عوي. سول كەزدەگى ويلاعان ويلارىڭىزدى قينالعاندارىڭىزدى، شاتتانىپ قۋانعاندارىڭىزدى ەسكە الساق، ءبىر عانيبەت بولار ەدى»، - دەدى ەلباسى تەلەجوباعا قاتىسۋشىلارعا قاراتا ايتقان سوزىندە.

اۆتور: كەنجەكەي توقتامۇرات قىزى