جامبىل وبلىسىنداعى 18 جاستاعى ساربازدىڭ ءولىمى: سوت كومانديرگە ۇكىم شىعاردى
سوتتىڭ باسپا ءسوز قىزمەتى مالىمەتىنشە، قازا تاپقان ساربازدىڭ كومانديرى سەرجانت ن. زورلىق-زومبىلىق كورسەتۋ، بوپسالاۋ، بيلىكتى اسىرا پايدالانۋ جانە اسكەري قىزمەتكەردى ءوز-وزىنە قول جۇمساۋعا جەتكىزۋ بويىنشا ايىپتالعان.
«سوت ن. -نىڭ شەكارا بەكەتىندە كەلىسىمشارت بويىنشا قىزمەت وتكەرگەنىن، موبيلدى توپتىڭ باسشىسى قىزمەتىن اتقارعانىن انىقتادى. 2022-جىلعى تامىزدا ول اسكەري قىزمەتشىلەر قارۋلى كۇشتەردىڭ جارعىسىن بۇزىپ، ناريادتاعى لاۋازىمداردى ءوز ەركىمەن اۋىستىرعانىن انىقتادى. ن. وسى سەبەپتى پايدالانىپ، قاتارداعى ك. -دەن اقشا بوپسالاي باستاعان. سونداي-اق، ن. اسكەري قىزمەتشىلەر ب.، ك. جانە ا. شەكارا زاستاۆاسى اۋماعىندا سپيرتتىك ىشىمدىكتەر ىشكەنىن ءبىلىپ، قىزمەتتىك وكىلەتتىگىن اسىرىپ، ولارعا دەنە جاراقاتىن سالعانى انىقتالدى»، - دەپ ءتۇسىندىردى باسپا ءسوز قىزمەتى وكىلى.
سوتتالۋشىنىڭ كىناسى جابىرلەنۋشىلەر مەن كۋاگەرلەردىڭ ايعاقتارىمەن، سونداي-اق، زاتتاي دالەلدەمەلەر، ونىڭ ىشىندە بانك شوتىنان ءۇزىندى كوشىرمەمەن، شەكارا زاستاۆاسىنان الىنعان بەينەجازبامەن جانە قىلمىستىق ءىستىڭ باسقا دا ماتەريالدارىمەن دالەلدەنگەنى ايتىلدى. الايدا اسكەري قىزمەتكەردى ءوز-وزىنە قول جۇمساۋعا جەتكىزۋ بويىنشا ونىڭ كىناسى راستالمادى.
«ن. ءوزىنىڭ قاراماعىنداعى ب. -عا جۇيەلى جانە نەگىزسىز تالاپ قويىپ، ونىڭ ار-نامىسى مەن قادىر-قاسيەتىن قورلادى دەپ ايىپتالدى. الايدا سوتتالۋشى زاستاۆادا نەبارى سەگىز كۇن بولدى، ونىڭ ىشىندە جابىرلەنۋشىمەن بىرنەشە رەت كەزدەسكەن، وسىنداي قىسقا مەرزىمدە ءوز-وزىنە قول جۇمساۋ ءۇشىن جاعىمسىز جاعداي تۋعىزباعان. دالەلدەمەلەر جيىنتىعى سوتتالۋشىنىڭ بۇل ارەكەتكە كىناسىن جوققا شىعارادى»، - دەلىنگەن سوت مالىمەتىندە.
سوت ۇكىمىمەن ن. كىنالى دەپ تانىلىپ، قىلمىستىق قۇقىقبۇزۋشىلىق جيىنتىعى بويىنشا ءۇش جىل التى ايعا باس بوستاندىعىنان ايىرىلدى. ال «ءوزىن-ءوزى ولتىرۋگە دەيىن جەتكىزۋ» بويىنشا ول كىناسىز دەپ تانىلىپ، اقتالدى.
ۇكىم زاڭدى كۇشىنە ەنگەن جوق.
ايتا كەتەيىك، 18 جاستاعى مەرزىمدى سارباز 2022-جىلعى تامىزدا جامبىل وبلىسىندا ءوز-وزىنە قول جۇمساعان ەدى. كەيىنىرەك باس اسكەري پروكۋراتۋرا جىنىستىق زورلىق-زومبىلىق نۇسقاسىن جوققا شىعاردى. سونداي-اق، 5 ادام جۇمىستان بوساتىلدى.
