قازاقستاندىقتار تۇركيادا زارداپ شەككەندەرگە كيىز ءۇي الۋعا 18 ميلليون تەڭگە جينادى
بۇل قاراجاتقا 40 قا جۋىق كيىز ءۇي الىپ، تۇركيانىڭ قازاقستانداعى باس كونسۋلدىعىنا جەتكىزۋ جوسپارلانۋدا، دەپ حابارلايدى قازاقپارات ءتىلشىسى.
بۇل باستامانى جۋرناليست نۇربەك بەكباۋ كوتەرگەن، ونى بەلگىلى قازاقستاندىق ءانشى ساكەن مايعازيەۆ قولدادى. وسىلايشا، 7-اقپاننان باستاپ قاراجات جيناۋ باستالدى جانە شامامەن 18 ميلليون تەڭگە جينالدى.
«بۇل قاراجات شامامەن 40 كيىز ءۇي ساتىپ الۋعا جەتكىلىكتى. ءبىزدىڭ جىگىتتەر الماتىنىڭ شەتىندە ورنالاسقان كيىز ءۇي سەحىمەن كەلىستى. سەرتيفيكاتتى، كيىز ۇيلەردىڭ ساپاسىن تەكسەرەمىز. بورتقا جۇكتەۋ ءۇشىن ارنايى قۇجاتتار قاجەت ەكەن. ءبىز قازىر كيىز ءۇي ساتىپ الۋعا بارا جاتىرمىز. كامازعا تيەپ، قازاقستانداعى تۇركيانىڭ باس كونسۋلدىعىنا اپارامىز. تۇركيا بيلىگىمەن كيىز ۇيلەردى تەزىرەك جەتكىزۋ ءۇشىن كەلىسسوزدەر جۇرگىزىلۋدە»، - دەدى ن. بەكباۋ قازاقپارات تىلشىسىنە بەرگەن سۇحباتىندا.
سونىمەن بىرگە ول شاتىر جەتكىزۋگە بولاتىن كەزدە نەگە كيىز ءۇي الىپ جاتقانىن ءتۇسىندىردى.
«ءبىز كيىز ءۇيدى جايدان- جاي تاڭدامادىق. بىرىنشىدەن، شاتىردا تەك 5-6 كۇن تۇراسىز، ال كيىز ۇيدە ۇزاق ۋاقىت ءومىر سۇرە الاسىز. كىلەم مەن كورپە توسەسەڭىز، كيىز ءۇي جايلى ۇيگە اينالادى. ەكىنشىدەن، كورىپ وتىرعانىڭىزداي، تۇركيادا ۇيلەر قيراپ جاتىر. ەگەر ءبىز شاتىر ورناتساق، توبەدەن قۇلاعان ءبىر تاس شاتىردى زاقىمداۋى مۇمكىن، ال كيىز ءۇي وڭايلىقپەن زاقىمدالمايدى. كيىز ءۇيدىڭ پسيحيكالىق، پسيحولوگيالىق ماڭىزى دا بار. تۇرىكتەر قازاقستاندى «اتاجۇرت» دەپ اتايدى، ويتكەنى قازاقستان اۋماعى - بارلىق تۇركىلەردىڭ، ونىڭ ىشىندە قازىرگى تۇرىكتەردىڭ اتا-بابالارىنىڭ وتانى. ءبىز تۇركياداعى باۋىرلارىمىزعا ءارقاشان كومەك كورسەتەتىنىمىزدى جانە ىنتىماقتى كورسەتكىمىز كەلەدى»، - دەدى نۇربەك بەكباۋ.
ازىرگە باستاماشىلار قاراجات جيناۋدى توقتاتقان جوق. ساتىپ الىنعان كيىز ۇيلەر تۇركيانىڭ قازاقستانداعى باس كونسۋلدىعىنا تاپسىرىلادى. نۇربەكتىڭ ايتۋىنشا، قازاقستانداعى تۇركيا ەلشىلىگىنىڭ اۋەجايدا ءوز قويماسى بار. وندا كيىز ۇيلەر سەرتيفيكاتقا تەكسەرىلىپ، تۇركياعا جىبەرىلەدى.
ايتا كەتەيىك، تۇركياداعى جەر سىلكىنىسىنەن قازا بولعاندار سانى 12,3 مىڭنان استى، 62914 ادام جاراقات الدى. حالىقتى ورنالاستىرۋ ءۇشىن 70818 شاتىر تىگىلگەن.
اۆتور
ايجان سەرىكجان قىزى
