الماتىدا اجەسىن ءولتىرىپ، ءۇيىن ورتەپ جىبەرگەن 18 جاستاعى جىگىت سوتتالدى
قالالىق پروكۋراتۋرا مالىمەتىنشە، 2020 -جىلدىڭ قاراشاسىندا مەدەۋ اۋدانىنداعى جەكە ۇيلەردىڭ بىرىندە ءورت شىققان. وقيعا ورنىنان ايەلدىڭ دەنەسى تابىلادى. سوت- مەديتسينالىق ساراپتاما ءولىم جەدەل جۇرەك- قان تامىرلارى جانە تىنىس الۋ جەتكىلىكسىزدىگى سالدارىنان بولعانىن كورسەتتى. بۇعان توك سوعۋى سەبەپ بولعان.
ساراپتاما قورىتىندىسى بويىنشا، ءورتتىڭ شىعۋىنا ەلەكتر سىمىنىڭ اپاتتى جاعدايدا جۇمىس ىستەۋى سەبەپ بولعان. بارلىق ساراپتاما قورىتىندىسىن ەسكەرە وتىرىپ، قىلمىس قۇرامىنىڭ بولماۋىنا بايلانىستى سوتقا دەيىنگى تەرگەپ- تەكسەرۋ توقتاتىلعان.
«الايدا كەيىن قىلمىستىق ءىس ماتەريالدارىن زەردەلەپ، مارقۇمنىڭ تۋىستارىنىڭ ءۋاجىن باعالاعان پروكۋرورلار قوسىمشا تەرگەۋ جۇمىستارىن باستادى. قاداعالاۋ ورگانىنىڭ نۇسقاۋىمەن ءمايىت ەكسگۋماتسيالانىپ، سوت- مەديتسينالىق ساراپتاما كوميسسياسى تاعايىندالدى. سونداي- اق، باسقا دا ءبىرقاتار تەرگەۋ ارەكەتى جۇرگىزىلدى»، - دەپ حابارلادى قالالىق پروكۋراتۋرادان.
قوسىمشا ساراپتاما ايەلدىڭ ولىمىنە قىلقىندىرۋ كەزىندەگى مەحانيكالىق اسفيكسيا سەبەپ بولعانىن كورسەتتى.
«مارقۇمنىڭ 18 جاستاعى نەمەرەسى قاساقانا كىسى ءولتىردى دەگەن كۇدىككە ىلىنگەن، ول ءوز كىناسىن مويىنداپ، سول كۇنى وتباسىلىق جانجال كەزىندە اجەسىن قىلقىندىرىپ ولتىرگەنىن ايتتى. ۇيدەگى اقشا مەن زەرگەرلىك بۇيىمداردى يەمدەنىپ، قىلمىستىڭ ءىزىن جاسىرۋ ءۇشىن قاساقانا ءورت شىعارعان»، - دەپ اتاپ ءوتتى قاداعالاۋ ورگانى.
سوت ۇكىمى بويىنشا ايىپتالۋشى ادام ولتىرگەنى جانە مۇلكىن ۇرلاعانى ءۇشىن كىنالى دەپ تانىلىپ، ول 12 جىل التى ايعا باس بوستاندىعىنان ايىرىلدى.
ۇكىم زاڭدى كۇشىنە ەنگەن جوق.
