نۇرسۇلتان نازاربايەۆ: ءبىز بيىل 18 ميلليون حالقى بار ەڭسەلى ەلگە اينالدىق - كەسكىن
«قۇرمەتتى وتانداستار! ساناۋلى ساتتەردەن سوڭ ءبىز كۇنتىزبەنىڭ جاڭا پاراعىن اشىپ، 2018 -جىلدى قارسى الامىز. جاڭا جىل - بارشا جۇرت ىزگى تىلەكپەن، ۇكىلەگەن ۇمىتپەن، اق نيەتپەن اسىعا كۇتەتىن ايرىقشا مەرەكە. 2017 -جىل تاۋەلسىزدىك جىلناماسىندا ەرەكشە ءىز قالدىرعان وقيعالارعا تولى بولدى. اتا زاڭىمىزعا وزگەرىستەر ەنگىزىلىپ، مەملەكەتتىك باسقارۋ جۇيەسىن جەتىلدىرۋ ءۇشىن ماڭىزدى قادام جاسادىق. بابالار داستۇرىنەن ءنار الىپ، بولاشاقتىڭ باعدارىن ايقىندايتىن «رۋحاني جاڭعىرۋ» جولىن باستادىق»، - دەدى ەلباسى ءوز قۇتتىقتاۋىندا.
مەملەكەت باسشىسى سونىمەن بىرگە، قۇتتىقتاۋ سوزىندە وتكەن جىل قازاق ءتىلىنىڭ جاڭا ءالىپبيى قابىلدانعان تاريحي شەشىم رەتىندە ەستە قالاتىنىن اتاپ ءوتتى.
«ءبىز ساياساتتا، ەكونوميكادا، سپورت سالاسىندا ماڭىزى زور حالىقارالىق شارالارعا باستاماشى بولدىق. تاتۋلىق پەن تۇراقتىلىقتىڭ مەكەنى - قازاقستان ەل مەن ەلدىڭ اراسىن جاقىنداتتى. الەمنىڭ ءار تۇكپىرىنەن كەلگەن سپورت ساڭلاقتارى قىسقى ۋنيۆەرسيادا تورىندە باس قوستى. استانا مەن بۇكىل ەلىمىزدىڭ اجارىن اشقان «ەكسپو-2017» كورمەسى بەدەلىمىزدى بيىكتەتىپ، ابىرويىمىزدى اسقاقتاتتى، ەلدىڭ ءار ۋاقىتتا جادىندا قالاتىن ۇلكەن ماسەلەنى شەشتى. بارشا مۇسىلمان ەلدەرىنىڭ باسشىلارى قاتىسقان جيىن ءوتتى. بيىل ءبىز 18 ميلليون حالقى بار ەڭسەلى ەلگە، مەرەيلى مەملەكەتكە اينالدىق»، - دەدى ءوز سوزىندە نۇرسۇلتان نازاربايەۆ.
ەلباسى ءوتىپ بارا جاتقان جىلدى بارشامىز ءۇشىن قۇتتى جىل بولدى دەپ سەنىممەن ايتۋعا بولاتىنىن جەتكىزدى.
«جارقىن جەتىستىكتەرىمىز بەن جاسامپاز جەڭىستەرىمىز - بەكەم بىرلىگىمىزدىڭ ارقاسى. بۇل بەلەستەردى وزدەرىڭىزبەن بىرگە الدىق. تولايىم تابىستارعا سىزدەرمەن بىرگە جەتتىك. قادىرلى قازاقستاندىقتار! بوساعامىزدان اتتاعالى تۇرعان 2018 -جىل دا بەرەكەلى بولار دەپ ويلايمىن. قازاقستان كەلەر جىلدى بىرىككەن ۇلتتار ۇيىمىنىڭ قاۋىپسىزدىك كەڭەسىنە تۇڭعىش رەت ءتوراعالىق ەتۋمەن باستايدى. بۇل جاس تاۋەلسىز مەملەكەت ءۇشىن ۇلكەن ابىروي. بۇل - قازىرگىدەي كۇردەلى كەزەڭدە ەلىمىزگە ارتىلعان ۇلكەن سەنىم جانە زور جاۋاپكەرشىلىك. الداعى جىلى ەركە ەسىلدىڭ جاعاسىنداعى اجارلى استانانىڭ 20 -جىلدىعىن اتاپ وتەمىز. ەلورداسى ەڭسەلى، قۋاتتى قازاقستاننىڭ ماقساتى بيىك، باعدارى ايقىن، كەلەشەگى كەمەل. كەلەر جىل ەل قازىناسىن ەسەلەپ، حالىقتىڭ ءال- اۋقاتىن ارتتىراتىن جەمىستى جىل بولسىن بارشامىزعا!»، - دەدى مەملەكەت باسشىسى.
ءسوز سوڭىندا مەملەكەت باسشىسى ءاربىر قازاقستاندىقتاردىڭ شاڭىراعىنا باقىت پەن بەرەكە، بىرلىك تىلەدى.
«الداعى جىلى ەلىمىز امان، جۇرتىمىز تىنىش بولسىن. ەل ىشىندە ىنتىماق پەن مولشىلىق ارتا بەرسىن. بارشامىز سول ءۇشىن قىزمەت ەتەيىك. ءاربىر شاڭىراققا باقىت- بەرەكە، بىرلىك تىلەيمىن. جاڭا جىل بارشامىزعا قۇتتى بولسىن! ەلىمىزگە جاڭا تابىستار اكەلسىن!» - دەپ قۇتتىقتاۋىن اياقتادى نۇرسۇلتان نازاربايەۆ.
