ەلوردادا ۇزدىك دەپ تانىلعان 18 سپورتشىعا «التىن تۇعىر» تابىستالدى

استانا. قازاقپارات - استانادا «التىن تۇعىر» ۇلتتىق سپورت ۇزدىكتەرى ماراپاتتالدى. حالقىمىزدىڭ باعا جەتپەس قازىناسى - ۇلتتىق سپورت تۇرلەرىن دامىتۋعا سۇبەلى ۇلەس قوسىپ جۇرگەن ازاماتتاردى ماراپاتتاۋعا ارنالعان شارا وتكەن جىلدان بەرى قولعا الىنىپ كەلەدى.

بيىل ەكىنشى رەت ۇيىمداستىرىلعان شارا بارىسىندا جىل بويى ۇزدىك دەپ تانىلعان 18 سپورتشىعا «التىن تۇعىر» تابىستالدى.

اتاپ ايتقاندا، كوكپار سپورتىندا ابىلايحان نىشانبەكوۆ (و ق و) «كوكپاردىڭ جىل شابۋىلشىسى»، جالعاس قيانوۆ (جامبىل وبلىسى) «كوكپاردىڭ جىل قورعاۋشىسى»، قۋانىشبەك قۇرامايەۆ («حان» اتىنىڭ يەسى) «كوكپاردىڭ جىل اتى»، نۇرداۋلەت مومىنوۆ («ايۋ» اتىنىڭ يەسى) «كوكپاردىڭ پىراعى»، تەمىرحان ايتبايەۆ (و ق و) «كوكپاردىڭ جىل سالىمگەرى»، قۇرمانبەك تۇرعانبەكوۆ (جامبىل وبلىسى) «كوكپاردان جىلدىڭ جاس ساڭلاعى»، ماقسات ازبايەۆ (س ق و) «ۇلتتىق ات سپورتى ويىندارىنىڭ ۇزدىك تورەشىسى» اتاندى.

ال اۋدارىسپاق ويىنىندا ءبىرجان قوساليەۆ (و ق و) «اۋدارىسپاقتىڭ اۋىر سالماقتاعى جىل بالۋانى»، ەرمەك جۇمابەك ۇلى «اۋدارىسپاقتىڭ 70 كەلى سالماقتاعى جىل بالۋانى»، سىرىم ءىزباساروۆ «اۋدارىسپاقتىڭ 90 كەلى سالماقتاعى جىل بالۋانى»، مارات نۇرپەيىسوۆ «اۋدارىسپاقتان اۋىر سالماقتاعى ۇزدىك بالۋانى»، جانباتىر بەكمۇسايەۆ (و ق و) «اۋدارىسپاقتان جىلدىڭ ۇزدىك جاتتىقتىرۋشىسى» اتاعىن يەلەندى.

بۇركىتشىلىك سپورتىندا ارمان قوشقاروۆ «جىل بۇركىتشىسى»، دۋلات ابەن كۇنتۋعان توقتىباي اتىنداعى نوميناتسيا «جىلدىڭ جاس بۇركىتشىسى»، باعجان باعداۋلەت «جاس بۇركىتشى» دەپ تانىلدى.

ات بايگەسىندە مەيىرجان سەكسەنوۆ («باقتورى» يەسى) «جىل التىن تۇلپارىنىڭ اتبەگىسى»، مەرحان جولداس ۇلى «جىل التىن تۇلپارىنىڭ شاباندوز بالاسى»، رامازان ساتىبالديەۆ «جىل شاباندوزى»، ەرتىلەۋ ساتىبالديەۆ «جىل ات باپكەرى»، ەرلان ساتىبولدينوۆ، سايات ارىنوۆ پەن عابيت ۇمبەتوۆ «جىل اتبەگىسى» رەتىندە ماراپاتتالدى.

توعىزقۇمالاقتان جانات قايمۋلدين «توعىزقۇمالاقتان جىل ويىنشىسى»، سالتانات ساپاربەكوۆا «توعىزقۇمالاقتان جىلدىڭ ۇزدىك ويىنشىسى» جانە قابيدوللا نۇرشين «توعىزقۇمالاقتان جىل جاتتىقتىرۋشىسى» اتاندى.

اسىق اتۋ سپورتىندا رۋسلان اسانوۆ «اسىق اتۋدان جىل مەرگەنى»، اداي مۇحامەدجان «اسىق اتۋدان ەرەسەكتەر اراسىندا جىل مەرگەنى»، دابىل ناۋرىزوۆ «اسىق اتۋدان جىل مەرگەنى جاتتىقتىرۋشىسى» دەپ تانىلدى.

جامبى اتۋدان الديار نۇرعازيەۆ «جامبى اتۋدان جىل مەرگەنى» اتاعىن جەڭىپ الدى. تەڭگە ءىلۋ ويىنىندا «تەڭگە ىلۋدەن جىل ويىنشىسى» اتاعىن اقتوبەلىك ءاليحان باشىمبايەۆ يەلەندى. «جىل قۇماي تازىسى» اتالىمىندا امانات توقابايەۆتىڭ تازىسى «جىل قۇمايى» اتاندى.

قازاق كۇرەسىنەن ايبەك نۇعىماروۆ «قازاق كۇرەسىنەن جىل بالۋانى»، ال سەرىك قورجىكەنوۆ «قازاق كۇرەسىنەن جىل بالۋانىنىڭ جاتتىقتىرۋشىسى» دەپ تانىلدى، دەپ حابارلايدى ق ر ۇلتتىق سپورت تۇرلەرى قاۋىمداستىعىنان.