قىتايدا 18 جىل بۇرىن ءولىم جازاسىنا كەسىلگەن جىگىت كىناسىز بولىپ شىقتى

استانا. قازاقپارات - قىتاي سوتى 1996-جىلى دارعا اسىلعان 18 جاستاعى جىگىتتىڭ ءىسىن قايتا قاراپ، قازىر كىناسىز ەكەنىن انىقتادى، - دەپ حابارلايدى South China Morning Post باسىلىمىنا سىلتەمە جاساپ. سوت جازىقسىز ايىپتالعان جىگىتتىڭ اتا-اناسىنان كەشىرىم سۇرادى.

دارعا اسىلعان حۋۋگجي (Huugjilt) ەسىمدى جىگىتكە ايەل ادامدى زورلاپ، ءولتىردى دەگەن ايىپ تاعىلعان. ءبىراق ىشكى موڭعوليانىڭ جوعارعى سوتى 18 جىل وتكەندە جىگىتتىڭ كىناسىز ەكەنىن مالىمدەگەن.

جاڭا ۇكىم دارعا اسىلعان جىگىتتىڭ دوسى ارىز جازعاننان كەيىن شىقتى، وقيعا بولعان كەزدە حۋۋگجيدىڭ جانىندا بولعان يان فەن (Yan Feng) حۋح-حوتو (Hohhot) قالاسىنداعى كوپشىلىك دارەتحانادان دوسى ەكەۋى ايەلدەردىڭ شۋلاعان داۋىسىن ەستىگەندەرىن ايتقان. يان فەن ول جەردەن كەتىپ قالۋدى ۇسىنعان، ءبىراق حۋۋگجي ايەلگە كومەكتەسپەك بولىپ، پوليتسياعا دا وقيعانى ءوزى حابارلاعان.

ايەلدى زورلاپ، ولتىرگەن ناعىز قىلمىسكەر چجاو چجيحۋن 2005-جىلى پوليتسياعا كىناسىن مويىنداعان، ءبىراق قىلمىستىق ءىس قازىر عانا قايتا قارالدى. جازىقسىز دارعا اسىلعان جىگىتتىڭ تۋىستارى جالداعان قورعاۋشىنىڭ ايتۋىنشا، ول ۇكىمەتتەن وتەماقى تالاپ ەتكەن. سوت جىگىتتىڭ وتباسىنا 30 مىڭ يۋان (5 مىڭ دوللار) تولەۋگە شەشىم شىعاردى.

ەسكە سالا كەتەيىك، بۇعان دەيىن ا ق ش- تا سوتتىڭ قاتە قاۋلىسىنىڭ كەسىرىنەن ءبىر ادامنىڭ تۇرمەدە 15 جىل بويى وتىرعانى حابارلانعان ەدى. ەندى رەسمي بيلىك وعان 3 ميلليون دوللار كولەمىندەگى وتەماقى تولەمەكشى.
tengrinews.kz