قازاقستان حالقى 18,27 ميلليون ادامعا جەتتى

استانا. قازاقپارات - قازاقستان حالقىنىڭ سانى 2018-جىلعى 1- شىلدەدە 18 ميلليون 272,4 مىڭ ادامدى قۇرادى. ءوسىم 2017-جىلدىڭ 1- شىلدەسىمەن سالىستىرعاندا 238 مىڭ ادام نەمەسە 1,3 پايىزدى قۇرادى، دەپ حابارلايدى قازاقپارات ستاتيستيكا كوميتەتىنە سىلتەمە جاساپ.

قالا تۇرعىندارىنىڭ جالپى سانى 10 ميلليون 529,1 مىڭ ادامعا جەتىپ، جالپى حالىق سانىنىڭ 57,6 پايىزىن قۇرادى. قازاقستاندا 7 ميلليون 743,3 مىڭ ادام (42,4 پايىز) اۋىلدىق جەرلەردە تۇرادى.

ۇستىمىزدەگى جىلدىڭ قاڭتار-ماۋسىم ايلارىندا 1 جاسقا دەيىنگى 1626 ءسابي شەتىنەگەن (وتكەن جىلدىڭ وسى كەزەڭىندە - 1605). 2018-جىلدىڭ العاشقى جارتىسىندا ءسابي ءولىمىنىڭ كوەففيتسيەنتى 1000 سابيگە 8,44 ءتى قۇرادى.

ءسابي ءولىمىنىڭ باستى سەبەبى پەريناتالدىق كەزەڭدە تۋىندايتىن جاعدايلار بولىپ وتىر. وسى التى ايدا 782 ءسابي شەتىنەگەن (بىلتىرعى كورسەتكىش - 793). بۇدان بولەك تۋما اۋىتقۋلار (328)، تىنىس الۋ جولدارىنىڭ اۋرۋلارى (124) جانە جازاتايىم وقيعالار (73) دا ءسابي ولىمىنە سەبەپشى بولۋدا.

2018-جىلدىڭ قاڭتار-ماۋسىم ايلارىندا قازاقستانعا كەلۋشىلەردىڭ سانى 2017-جىلدىڭ وسى كەزەڭىمەن سالىستىرعاندا 26,5 پايىزعا قىسقارىپ، كەتۋشىلەردىڭ سانى 14 پايىزعا ارتتى. ت م د ەلدەرىنەن كەلگەندەردىڭ سانى جالپى كورسەتكىشتىڭ 77,2 پايىزىن، ال دوستاستىق ەلدەرىنە كەتكەندەردىڭ سانى 89,7 پايىزىن قۇرادى.

ەل ىشىندەگى كوشى-قون كورسەتكىشى 15 پايىزعا قىسقاردى. ءوڭىرارالىق كوشى-قوننىڭ وڭ سالدوسى ەلىمىزدىڭ بەس وڭىرىندە - شىمكەنت (43493 ادام)، الماتى (16943)، استانا (5073) قالالارىندا جانە ماڭعىستاۋ (601)، اتىراۋ (34) وبلىستارىندا بايقالدى.