الماتىدا 17 جاسار قىز دارەتحانادا بوسانىپ، نارەستەسىن تاستاپ كەتكەن
الماتى قالالىق پوليتسيا دەپارتامەنتىنىڭ مالىمەتىنشە، تۇندە قالانىڭ تۇركسىب اۋدانىندا جاڭا تۋعان نارەستەنى قۇتقارۋعا ارنالعان ارنايى ءىس-شارا ءوتتى. تۇركسىب اۋداندىق پوليتسيا باسقارماسىنىڭ كامەلەتكە تولماعاندار ءىسى جونىندەگى ۋچاسكەلىك ينسپەكتورى نۇرجان شاتۋنوۆتىڭ ايتۋىنشا، ساعات ەكىدە كامەلەتكە تولماعان قىزدىڭ تۇسىك تاستاعاندىعى تۋرالى حابار بەرىلگەن. ونىڭ قالاداعى اۋرۋحانالاردىڭ بىرىنە جاتقىزىلعانى بەلگىلى بولدى.
«دارىگەرلەرمەن سويلەسكەننەن كەيىن وقيعا ورنىنا بارىپ، تەكسەرۋدى ءجون كوردىم. باسىما «بالا قايدا؟» دەگەن سۇراق كەلدى. قىزدىڭ اناسىنان وقيعاعا دەيىن ونىڭ سىرتتاعى دارەتحانادا ءبىراز ۋاقىت بولعانىن ءبىلدىم. دارەتحانا ىشىنەن قان ىزدەرىن تاۋىپ، ىشىندە جاتقان بالانى كوردىم. ول دەمالىپ جاتتى. وسى كەزدە جەدەل تەرگەۋ توبى كەلدى، ونىڭ قۇرامىندا كريمينالدىق پوليتسيا ءبولىمىنىڭ جەدەل ۋاكىلى عازيز حاماسقاليەۆ بولدى. دارەتحانانىڭ ەدەنىنەن تاقتايلاردى تەز الىپ تاستادىق. ارىپتەسىم عازيز تومەنگە ءتۇسىپ، بالانى قىزمەتتىك كويلەگىنە وراپ، ابايلاپ شىعارىپ الدى»، - دەدى نۇرجان شاتۋنوۆ.
ال، 17 جاسار قىزدىڭ اناسى ونىڭ جۇكتى بولعانىن بىلمەگەنىن ايتقان. قازىرگى ۋاقىتتا بۇل دەرەك بويىنشا تۇركسىب اۋداندىق پ ب- نا قاراستى پوليتسيا بولىمىندە تەرگەۋ امالدارى باستالدى.
«قازىر بالانىڭ جاعدايىن ءبىلىپ قايتتىق. ول دارىگەرلەردىڭ باقىلاۋىندا، جانساقتاۋ بولىمىندە جاتىر. ءوز بەتىنشە دەمالىپ جاتىر - بۇل جاڭالىققا بالانى قۇتقارۋعا قاتىسقان بارلىق ارىپتەستەرىم قاتتى قۋاندى. دەمەك، بالا ءومىر سۇرەدى. ول تۋعاننان ءوز ءومىرى ءۇشىن كۇرەستى. وعان زور دەنساۋلىق، ۇزاق عۇمىر تىلەيمىز. باقىتتى بولىپ وسە بەرسىن. مەن ءۇش ۇلدىڭ اكەسىمىن. سوندىقتان، بۇل وقيعا مەنى بەيجاي قالدىرمادى. ءبىز ءوز ارىپتەستەرىمىزبەن بىرگە قۇتقارىلعان نارەستەنىڭ تاعدىرىن مىندەتتى تۇردە قاداعالايمىز جانە مۇمكىندىگىنشە وعان قاتىسىمىز دا بولادى»، - دەدى نۇرجان شاتۋنوۆ.
