كوشكىن 17 ادامنىڭ ءومىرىن قيىپ كەتتى، قار استىندا ونشاقتى ادام قالۋى مۇمكىن
جەرگىلىكتى پوليتسيا حابارلاعانداي، جۇما كۇنى 500 مەتر بيىكتىكتەن قۇلاعان قار كوشكىنى مەن تاس كەسەكتەرىنىڭ استىندا 30 عا جۋىق ادام قالعان. ەكىنشى تاۋلىك بويى جۇرگىزىلىپ جاتقان قۇتقارۋ جۇمىستارى بارىسىندا 17 ادامنىڭ دەنەسى تابىلدى، ونىڭ ىشىندە ءبىر جاسار ءسابي دە بار.
قۇتقارۋشىلار ءتورت ادامدى تىرىدەي قۇتقارىپ الدى، ولاردىڭ بىرەۋى قار قۇرساۋىندا 12 ساعات جاتقان.
كۋاگەرلەردىڭ ايتۋىنشا، كوشكىننىڭ استىندا ءالى ونشاقتى ادام بار بولۋى مۇمكىن.
شتاتتىڭ تابيعي اپاتتارمەن كۇرەس ءمينيسترى دجاۆايد مۋستافا وپات بولعانداردىڭ وتباسىنا 400 مىڭ رۋپي كولەمىندە (6 مىڭ دوللار) تولەماقى بەرىلەتىنىن ايتتى.
وقيعا جەرگىلىكتى حالىق اراسىندا نارازىلىق تۋدىرىپ جاتىر. 10 شاقىرىمدىق تۋننەل سالىپ بەرە الماعاندىقتان، جەرگىلىكتى جۇرت ۇكىمەتتىڭ وسى ايماققا دەگەن نەمقۇرايلىلىعىن سىنعا الدى. كارنا جانە كۋپۆارا قالالارىن بايلانىستىراتىن 70 شاقىرىمدىق تاس جول قىس ايلارىندا ەڭ قاۋىپتى اۋماققا اينالادى ەكەن. كەلتىرىلگەن مالىمەتكە سايكەس، سوڭعى 10 جىلدا وسى تاۋلى وڭىردەگى قاۋىپتى تاس جولدىڭ بويىندا 300 دەي ادام وپات بولعان.
