ۆاتيكان قازاقستانعا ورتا ازيانىڭ 17-18- عاسىرلارداعى كارتاسىنىڭ كوشىرمەسىن تابىستادى
8 -قازاندا قازاقستان حالقى اسسامبلەياسىنىڭ 20 جىلدىعى اياسىندا ۆاتيكاندا «قازىرگى زامانعى ەتنيكاارالىق جانە كونفەسسياارالىق كەلىسىم» اتتى عىلىمي- تاجىريبەلىك كونفەرەنسيا مەن فوتوكورمە ءوتتى. ءىس- شاراعا عىلىم وكىلدەرى، ۆاتيكانداعى ەلشىلىك كورپۋستىڭ جەتەكشىلەرى قاتىستى.
ۆاتيكانداعى قازاقستان ەلشىسى مۇحتار تىلەۋبەردى كونفەرەنسياعا قاتىسۋشىلار الدىندا ءسوز سويلەدى. ق ر پارلامەنت ءماجىلىسىنىڭ دەپۋتاتى جۇماتاي اليەۆ قازاقستان حالقى اسسامبلەياسىنىڭ نەگىزگى ماقساتتارى مەن مىندەتتەرىن ايتىپ ءوتتى. ول اسسامبلەيانىڭ قۇرىلۋ تاريحىن ايتا وتىرىپ، ونى قۇرۋدا، قولداۋدا قازاقستان پرەزيدەنتى نۇرسۇلتان نازاربايەۆتىڭ ۇلكەن رول اتقارعانىنا توقتالدى.
ريم پاپاسى كەڭەسىنىڭ ءدىنارالىق قاتىناس جونىندەگى حاتشىسى قازاقستانداعى ءدىنارالىق ىنتىماقتاستىق پەن الەۋمەتتىك تۇراقتىلىققا نازار اۋداردى. سونىمەن قاتار، ول ۆاتيكاننىڭ قازاقستان پرەزيدەنتىنە ۇلكەن قولداۋ بىلدىرەتىنىن ايتتى.
كونفەرەنتسيا سوڭىندا ورتا ازيانىڭ XVII- XVIII عاسىرلارداعى كارتاسىنىڭ كوشىرمەسى رەسمي تۇردە تابىستالدى.
