«نازار اۋدارىڭىز - بالالار!»: ءۇش كۇندە 16 مىڭنان استام فاكتى انىقتالدى
بۇل تۋرالى ق ر ىشكى ىستەر مينيسترلىگىنىڭ رەسمي وكىلى ءنۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.
«مەكتەپ دەمالىسى قارساڭىندا، وتكەن اپتادا ەلىمىزدە «نازار اۋدارىڭىز - بالالار!» اتتى الدىن الۋ ءىس- شاراسى ءوتتى. بۇل اكسيانىڭ ماقساتى - بالالاردىڭ قاتىسۋىمەن بولاتىن جول-كولىك وقيعالارىنىڭ الدىن الۋ. اتالعان ءىس-شارانىڭ العاشقى ءۇش كۇنىندە جول قوزعالىسى ەرەجەلەرىن بۇزۋدىڭ 16 مىڭنان استام جاعدايى تىركەلدى. ونىڭ ىشىندە: 1223 فاكتى جول قيىلىستارىنان ءوتۋ ەرەجەلەرىن، 1415 فاكتى جاياۋ جۇرگىنشىلەر وتكەلىنەن ءوتۋ ەرەجەلەرىن بۇزۋ. بالالاردى تاسىمالداۋ ەرەجەلەرىن بۇزۋعا قاتىستى 1348 فاكتى ەسەپكە الىندى»، - دەدى ول ىشكى ىستەر مينيسترلىگىندە وتكەن باسپا ءسوز ءماسليحاتى بارىسىندا.
سونىمەن قاتار رەسمي وكىل پوليتسيا قىزمەتكەرلەرى جول جانە كوممۋنالدىق قىزمەت وكىلدەرىمەن بىرلەسىپ، جالپى ءبىلىم بەرۋ مەكەمەلەرىنە ىرگەلەس جاتقان اۋماقتارعا جاياۋ جۇرگىنشىلەر وتكەلدەرىن جول بەلگىلەرىمەن، ارنايى تاڭبالارمەن، قورشاۋلارمەن جانە جول قوزعالىسىن رەتتەۋدىڭ باسقا دا تەحنيكالىق قۇرالدارىمەن جابدىقتاۋ بويىنشا 4 مىڭنان استام تەكسەرۋ جۇرگىزگەنىن ايتتى. «تەكسەرۋ ناتيجەلەرى بويىنشا ۋاكىلەتتى ۇيىمدارعا كەمشىلىكتەردى جويۋ بويىنشا 1704 نۇسقاما بەرىلدى»، - دەدى نۇردىلدا وراز.
اۆتور: مارلان جيەمباي
