13:27, 15 - ماۋسىم 2020 | GMT +5
باياناۋىل تۋريستەر ءۇشىن 16- ماۋسىمنان باستاپ جابىلادى
پاۆلودار وبلىسى. قازاقپارات - باياناۋىل اۋدانىنىڭ اكىمى قانات كارىموۆ الەۋمەتتىك جەلىدە اۋدان تۇرعىندارى مەن قوناقتارىنا ۇندەۋ جولدادى، دەپ حابارلايدى قازاقپارات.
«توتەنشە جاعداي رەجيمىن الىپ تاستاعانىنا قاراماستان، ءبىزدىڭ وبلىستاعى ەپيدەميولوگيالىق جاعداي دا وزەكتى بولىپ قالۋدا. ءوزىمىز بەن اينالاداعى ادامداردى كوروناۆيرۋستان ساقتاۋ ءۇشىن قاۋىپسىزدىك شارالارىن ساقتاۋ كەرەك، - دەيدى قانات كارىموۆ.
«باياناۋىل اۋدانىنىڭ باس سانيتارلىق دارىگەرىنىڭ قاۋلىسىنا سايكەس، 16- ماۋسىم ساعات 00-دەن باستاپ باياناۋىل، جاسىباي، سابىندىكول، تورايعىر، بىرجانكول دەمالىس ايماعىنىڭ بارلىق دەمالىس ۇيلەرى مەن جاعاجايلارى سانيتارلىق-ەپيدەميولوگيالىق جاعداي جاقسارعانعا دەيىن جابىلدى. بۇل - ءبىرىنشى كەزەكتە ءوزىمىزدىڭ اماندىعىمىز ءۇشىن وتە ماڭىزدى»، دەپ تولىقتىردى اكىم.
